އުރީދޫ މަސްރޭހުގެ ޗެމްޕިއަންކަން ސްޓެލްކޯ ކަނބަލުންނަށް

މުބާރާތުގެ ތާރީހުގައީ ފާހަގަކުރެވޭ ރެކޯޑަކާ އެކު، 11ވަނަ އުރީދޫ މަސްރޭހުގެ ޗެމްޕިއަންކަން ސްޓެލްކޯ ކަނބަލުން ހޯދައިފިއެވެ.

ޖުމްލަ 23 ޓީމު ވާދަކުރި އެ މުބާރާތުގެ ޗެމްޕިއަންކަން ސްޓެލްކޯ ކަނބަލުން ހޯދީ ފައިނަލުގައި ޓީމް އެފްއެސްއެމް، ކެޔޮޅު ބައްޕި، އަދި ގޯޅިއަންސް އާ ވާދަކޮށެވެ.

މޮޅުވި ޓީމް، ސްޓެލްކޯ ކަނބަލުންނަށް ފައިނަލުގައި 680.80 ޕޮއިންޓު ލިބުނު އިރު، ދެވަނަ އަށް ދިޔަ އެފްއެސްއެމް ޓީމަށް ލިބުނީ 191.05 ޕޮއިންޓެވެ. ތިންވަނަ ހޯދި ޓީމް ގޯޅިއަންސްއަށް ލިބުނީ 178.85 ޕޮއިންޓެވެ.

މުބާރާތުގެ އެއްވަނަ ޓީމަށް އުރީދޫއިން ވަނީ 50،000 ރުފިޔާގެ ފައިސާގެ އިނާމަކާއި، އަގުހުރި އެތައް އިނާމެއް ދީފައެވެ.

މި އަހަރު އެންމެ ބަރު މަހެއް ބޭނީ އާރްޑީސީ ޓީމުގެ ޔާސިރެވެ. އޭނާ ވަނީ 11.95 ކިލޯގެ ފާނައެއް ބާނާފައެވެ. މުބާރާތުގެ ފިރިހެން މަސްވެރިޔާގެ އިނާމު ހޯދީ ސްޓެލްކޯ ކަނބަލުން ޓީމުގެ އަބްދުލްއަޒީޒެވެ. އޭނާ ވަނީ 49 މަސް ބާނާފައެވެ. މި ދެ މަގާމަށް ވެސް 5000 ރުފިޔާގެ ފައިސާގެ އިނާމެއް އުރީދޫއިން ދިނެވެ. މުބާރާތުގައި އެންމެ "ހިންގާލި" ޓީމަކަށް ހޮވުނީ ޓީމް އެފްއެސްއެމެވެ.

އުރީދޫ މަސްރޭހަކީ ކޮންމެ އަހަރެއްގެ ރޯދަމަހާ ދިމާކޮށް އުރީދޫއިން ބާއްވާ ޚާއްސަ ހަރަކާތެކެވެ. މި އަހަރު މި މުބާރާތް މި ބޭއްވުނީ ކޮވިޑުގެ ސަބަބުން ދެ އަހަރުގެ މެދު ކެނޑުމަކަށް ފަހުއެވެ.