އަމީރުލްޙައްޖުގެ ގޮތުގައި މިއަހަރު އިސްލާމިކް މިނިސްޓަރު

މިއަހަރުގެ އަމީރުލްޙައްޖުގެ ގޮތުގައި އިސްލާމިކް މިނިސްޓަރު އަހުމަދު ޒާހިރު ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހަމަޖައްސަވައިފިއެވެ.

ރައީސް އޮފީހުން ބުނީ މިއަހަރު ރާއްޖެއިން ހައްޖަށްދާ މީހުންގެ ކަންތައްތައް އިސްކޮށް ބެލެހެއްޓެވުމަށްޓަކައި އަމީރުލް ހައްޖުގެ ގޮތުގައި އިސްލާމިކް މިނިސްޓަރު ޒާހިރު ހަމަޖައްސަވާފައި ވާކަމަށެވެ.

ކޮންމެ އަހަރަކުވެސް ދިވެހި ހައްޖުވެރިންގެ ކަންކަމާ ހަވާލުވެވަޑައިގަންނަވާނެ ދައުލަތުގެ އިސް މަސްއޫލްވެރިޔަކު ރައީސް ކަނޑައަޅުއްވައި، ޙައްޖު މޫސުމުގައި ސަޢޫދީއަށް ފޮނުވައެވެ.

މިއަހަރު ރާއްޖެއިން މީހުން ޙައްޖަށް ގެންދިޔުމަށް ލިބިފައިވަނީ އެންމެ 453 ޖާގައެވެ. އޭގެ ތެރެއިން 352 ޖާގަ ހާއްސަކޮށްފައިވަނީ ހައްޖު ކޯޕަރޭޝަންގެ ކިއުގައި މިވަގުތު ތިބި މީހުންނަށެވެ.

އަދި ބާކީ 100 ޖާގައަށް އެދުމުގެ ފުރުސަތު ހުޅުވާލާ މިހާރު ފޯމް އަންނަނީ ބަލައިގަންނަމުންނެވެ. މި 100 މީހުން ހޮވުމަށް ހަމަޖެހިފައިވަނީ އަންނަ މަހުގެ 2 ވަނަ ދުވަހު ނަގާ ގުރުއަތުންނެވެ.

ހައްޖު ކޯޕަރޭޝަނުން ހައްޖަށް ދިއުމަށް ޖާގަ ލިބި، ނުދެވޭ މީހުން ވެސް މިއަދުގެ ކުރިން އެކަން އެ ކޯޕަރޭޝަނަށް އެންގުމަށް ވަނީ ބުނެފައެވެ.