ތިމާވެށީގެ ދުވަހާ ގުޅުވާ އަންނަ ހޮނިހިރު ދުވަހުގެ ހަވީރުގެ ވަގުތަކީ ފައިމަގުގައި އުޅޭ ވަގުތެއްކަމަށް ހަމަޖައްސައިފި

ތިމާވެށީގެ ދުވަހާ ގުޅުވާ އިންޖީނުލީ އުޅަނދުތައް ދުއްވުން މަނާކޮށް، އަންނަ ހޮނިހިރު ދުވަހުގެ ހަވީރުގެ ވަގުތަކީ ފައިމަގުގައި އުޅޭ ވަގުތެއްގެ ގޮތުގައި ކުޅުދުއްފުށީ ސިޓީ ކައުންސިލުން ނިންމައިފި އެވެ.

އެގޮތުން މިމަހު ހަތަރުވަނަ ދުވަހު ހަވީރު 16:00 - 18:00 އަކީ ފައިމަގުގައި އުޅޭ ވަގުތެއްގެ ގޮތުގައި ސިޓީ ކައުންސިލުން ވަނީ ނިންމާފަ އެވެ.

ކުޅުދުއްފުށީ މޭޔަރު މުހައްމަދު އާތިފް ކޭއޯއަށް ވިދާޅުވީ، ދުނިޔޭގެ ތިމާވެށީގެ ދުވަހާ ގުޅުވައިގެން އެންވަޔަރަމެންޓް މިނިސްޓްރީން ކުރިއަށްގެންދާ ހަރަކާތުގައި ބައިވެރިވުމުގެ ގޮތުން އެ ދުވަހުގެ ހަވީރުގެ ވަގުތަކީ ފައިމަގުގައި އުޅޭ ވަގުތެއްގެ ގޮތުގައި ހަމަޖެއްސީ ކަމަށެވެ.

މީހުން ދިރިއުޅޭ ހުރިހާ ރަށަކަށް ބައިވެރިވުމަށް ހުޅުވާލި މި ހަރަކާތުގައި ކުޅުދުއްފުށީ ސިޓީ ކައުންސިލުން ބައިވެރިވެފައިވާއިރު ޒަރޫރީ ބޭނުންތަކުގައި ކޮންމެހެން ބޭނުންކުރާ ވެހިކަލްތައް ދުއްވޭނެ ކަމަށް މޭޔަރު ވިދާޅުވި އެވެ.

މޭޔަރު ވިދާޅުވީ، ފުލުހުން ޓްރެފިކް ބަލަހައްޓާނެ ކަމަށާއި ގަވައިދާ ހިލާފުވާ ފަރާތްތަކަށް ފިޔަވަޅު އަޅާނީ ފުލުހުން ކަމަށެވެ. ތިމާވެށީގެ ދުވަހާ ގުޅުވައިގެން މާދަމާ ގަސް އިންދާއި ސާފުކުރުމުގެ ޕްރޮގުރާމެއްވެސް ކުޅުދުއްފުށީގައި ކުރިއަށްގެންދާ ގޮތަށް ވަނީ ނިންމާފަ އެވެ.