މުހިއްމު މަޝްވަރާތަކަކަށް މިނިސްޓަރު ޝާހިދު ސައުދީއަށް

ރާއްޖޭގެ ތަރައްގީއާއި ގުޅޭ މުހިންމު މަޝްވަރާތަކެއް ކުރުމަށް ފޮރިން މިނިސްޓަރ އަބްދުﷲ ޝާހިދު ސައުދީ އަރަބިއްޔާއަށް ވަޑައިގެންފިއެވެ.

ޝާހިދުގެ މިދަތުރުފުޅުގައި ރައީސް އިބްރާހިމް މުހައްމަދު ސާލިހުގެ ހާއްސަ ސިޓީ ފުޅެއް ސައުދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒަށް އެރުވުމަށް ވަނީ ހަމަޖެހިފައެވެ.

މިދަތުރުފުޅަކީ އެޤައުމުގެ ފޮރިން މިނިސްޓަރ އަމީރު ފައިސަލް ބިން ފަރުހާން އާލް ސައުދުގެ ދައުވަތަކަށް ކުރައްވާ ރަސްމީ ދަތުރުފުޅެކެވެ. މިދަތުރުފުޅުގައި ސައުދީ އަރަބިއްޔާއާއި ރާއްޖެއާއި ދެމެދު ރަސްމީ މަޝްވަރާތައް ބޭއްވުމަށްވެސް ވަނީ ހަމަޖެހިފައެވެ.

އެގޮތުން ސަޢުދީގެ އެހީގައި ކުރިއަށް ގެންދެވިފައިވާ މަޝްރޫއުތަކާއި ކުރިއަށް އޮތް ތަނުގައި ސައުދީގެ އެހީތެރިކަން ހޯދުމަށް ހަމަޖެހިފައިވާ މަޝްރޫއުތަކާއި އެކި ދާއިރާތަކުން މަޝްވަރާ ކުރުމަށްވެސް ވަނީ ހަމަޖެހިފައެވެ. އަދި ދެގައުމުގެ ގުޅުން އިތުރަށް ހަރުދަނާ ކުރުމާއި ގުޅޭގޮތުން މަޝްވަރާ ކުރުމަށްވެސް ވަނީ ހަމަޖެހިފައެވެ.