ރަސޫލާއަށް ފުރައްސާރަ ކުރުމާ ދެކޮޅަށް ހުށަހެޅި މައްސަލަ ބޭރުކުރަން ކުޅުދުއްފުށީ ދެ މެމްބަރުން ވޯޓު ދިން!

އިންޑިއާގައި ވެރިކަންކުރާ ޕާޓީ ބީޖޭޕީގެ ތަރުޖަމާން ކީރިތި ރަސޫލާ ޞައްލަﷲ ޢަލައިހި ވަސައްލަމައަށް ފުރައްސާރަކުރި މައްސަލައާ ގުޅިގެން ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލަން ކުޅުދުއްފުށީ ތަމްސީލުކުރާ ރައްޔިތުން މަޖިލީހުގެ ދެ މެންބަރުންވަނީ ވޯޓު ދީފަ އެވެ.

ދިވެހި ސަރުކާރުން މި މައްސަލާގައި އެއްވެސް ފިޔަވަޅުއަޅާފައިނުވާތީ އެކަން ކުށްވެރިކުރުމަށާއި ސަރުކާރުން އެ މައްސަލާގައި ފިޔަވަޅު އެޅުމަށް ދިވެހި ސަރުކާރަށް ގޮވާލުމަށް އެ މައްސަލާގައި ގޮވާލާފައިވެއެވެ. އަދި އިސްލާމްދީން ހިމާޔަތްކުރުމަކީ ރާއްޖޭގެ ދީނީ އެއްބައިވަންތަކަން ރައްކާތެރިކުރުމުގެ ޤާނޫނުގެ ދަށުން ދިވެހި ސަރުކާރާއި ރައްޔިތުންގެ މައްޗަށް ލާޒިމު ކަމެއް ކަމަށާއި، ރަސޫލާ ޞައްލަﷲ ޢަލައިހި ވަސައްލަމައަށާއި ޤުރުއާނަށް ތައުހީނުކުރުމަކީ ހުރިހާ މުސްލިމުން ކަންބޮޑުވާ ކަމެއް ކަމަށާއި، އަދި ސައްތައިންސައްތަ އިސްލާމީ ޤައުމެއްގެ ހައިސިއްޔަތުން އެކަމަކީ ދިވެހި މުސްލިމު ރައްޔިތުންވެސް ނުހަނު ކަންބޮޑުވާ ކަމެއް ކަމުގައި މައްސަލަ ހުށަހެޅުއްވި މެމްބަރު އާދަމް ޝަރީފް އުމަރު ވިދާޅުވެފައިވެއެވެ.

މައްސަލަ ބަލައި ނުގަތުމަށް ވޯޓު ދިން މެމްބަރުން

މި މައްސަލަ ބަލައިގަތުމާ ގުޅޭ ގޮތުން ނެގި ވޯޓުގައި 43 މެންބަރުން ބައިވެރިވެވަޑައިގެންނެވިއިރު 33 މެންބަރުން ވޯޓު ދެއްވީ މައްސަލަ ބަލައިނުގަތުމަށެވެ. މައްސަލަ ބަލައިގަތުމަށް ވޯޓު ދެއްވީ 10 މެންބަރުންނެވެ. މަޖިލީހުގެ 65 ގޮނޑިއާއެކު ބޮޑު އަޣުލަބިއްޔަތު އޮންނަ އެމްޑީޕީންވަނީ އެ މައްސަލަ ބަލައިނުގަތުމަށް ވޯޓު ދީފައެވެ.