ހަނިމާދޫއާއެކު އިތުރު 6 ރަށެއްގައި ހޮސްޕިޓަލް އަޅާނެ ބަޔަކު ހޯދުމަށް އަނެއްކާވެސް އިއުލާންކޮށްފި

ހަތް ރަށެއްގައި 30 އެނދުގެ ހޮސްޕިޓަލެއް އަޅައި ދޭނެ ބަޔަކު ހޯދަން ފިނޭންސް މިނިސްޓްރީން އަނެއްކާވެސް އިއުލާނުކޮށްފިއެވެ.

ހޮސްޕިޓަލް އަޅަން ނިންމާފައި ވަނީ ހދ. ހަނިމާދޫ، ށ. މިލަންދޫ، ނ. ވެލިދޫ، ކ. ތުލުސްދޫ، އގ. މާމިގިލި، ވ. ވެލިދޫ އަދި ތ. ވިލުފުށީގައެވެ. އެއިން ކޮންމެ ރަށެއްގައި ވެސް އަޅަނީ 30 އެނދުގެ ހޮސްޕިޓަލެވެ.

މިއީ ފިނޭންސް މިނިސްޓްރީ މި މަސައްކަތް އިއުލާނު ކުރި ދެވަނަ ފަހަރެވެ. ފުރަތަމަ އިއުލާން ކޮށްފައިވަނީ މިއަަހަރު އޭޕްރިލް މަހު ތެރޭގަ އެވެ.

ފިނޭންސް މިނިސްޓްރީން ކުރި އިއުލާނެއްގައި ބުނެފައިވަނީ ހެލްތް މިނިސްޓްރީގެ އެދުމުގެ މަތިން، ހަތް ރަށެއްގައި ހޮސްޕިޓަލް އެޅުމުގެ މަސައްކަތް ކޮށްދޭނެ ފަރާތެއް ބޭނުންވާ ކަމަށެވެ.

ބީލަމުގައި ބައިވެރިވެވޭނީ އިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ގަވާއިދުގެ މަތިން ރަޖިސްޓަރީވެ ޝަރުތު ހަމަވާ ފަރާތްތަކަށް ކަމަށް ވެސް އިއުލާނުގައި ބުނެފައިވެއެވެ. މަސައްކަތް ކުރުމަށް ޝަރުތުހަމަވާ ފަރާތެއް ހޯދުމުގެ ކަންތައް ކުރިޔަށް ގެންދެވޭނީ އިންޓަނޭޝަނަލް ކޮމްޕެޓިޓިވް ބިޑިން (އައިސީބީ) އުސޫލުގެ މަތިންނެވެ.