ސަރުކާރުގެ މުއައްސަސާތަކުން ގައުމީ ދިދަ ބޭނުންކުރުމުގެ އުސޫލެއް ކަނޑައަޅުއްވައިފި

ދިވެހި ގައުމީ ދިދަ ނެގުމާއި ދިދަ ބޭނުންކުރުމުގައި ސަރުކާރުގެ މުއައްސަސާތަކުން އަމަލުކުރެއްވުމަށް ރައީސް އިބްރާހީމް މުހައްމަދު ސޯލިހް އުސޫލެއް ކަނޑައަޅުއްވައިފި އެވެ.

މިއުސޫލަށް އަމަލުކުރުމަށް ދެންނެވުމެއްގެ ގޮތުގައި ރައީސް އޮފީހުން ވަނީ ދައުލަތުގެ ހުރިހާ އިދާރާތަކަށް އަންގާފަ އެވެ.

މި އުސޫލުގައި ސަރުކާރުގެ މުއައްސަސާތަކުގެ ތެރެއިން ގައުމީ ދިދަ 24 ގަޑިއިރު ނަގައިފައި ހުންނަންވާ ތަންތަނާއި، ހެނދުނު 6:00 އިން ހަވީރު 6:00 އަށް ގައުމީ ދިދަ ނަގާފައި ހުންނަންވާ މުއައްސަސާތައް ވެސް ބަޔާންކޮށްފައިވެ އެވެ.

- ރައީސުލްޖުމްހޫރިއްޔާގެ އޮފީސް
- ރައީސުލްޖުމްހޫރިއްޔާ ދިރިއުޅުއްވާ ރަސްމީ ގެކޮޅު
- ރައީސުލްޖުމްހޫރިއްޔާގެ ނާއިބު ދިރިޅުއްވާ ރަސްމީ ގެކޮޅު
- ދިވެހިރާއްޖޭގެ ގައުމީ ދިފާއީ ބާރުގެ މައި މަރުކަޒު
- ދިވެހި ފުލުހުންގެ ހިދުމަތުގެ މައި މަރުކަޒު
- މެދުކެނޑުމެއް ނެތި 24 ގަޑިއިރު ހިދުމަތް ދޭ ސަރުކާރުގެ މުއައްސަސާތައް

ގައުމީ ދިދައާއި އެހެން ދިދައެއް އެކުގައި ހުންނަ ގޮތަށް ދެ ދިދައެއް ނަގާނަމަ ނުވަތަ ބަހައްޓާނަމަ ގައުމީ ދިދަ ހުންނަންވާނީ އެ ދިދައެއްގެ ކަނާތްފަރާތުގައި ކަމަށްވެސް ދެންނެވުމުގައިވެ އެވެ. އަދި ސަރުކާރުގެ މުއައްސަސާތަކުން ގައުމީ ދިދައަށް ހުރުމަތްތެރިކޮށް ހިތަައި، ގައުމީ ދިދައިގެ ހުރުމަތަށް އުނިކަމެއް އަންނަ ފަދަ މިންވަރަކަށް ބާވެފައިވާ ނުވަތަ ހަލާކުވެފައިވާ ދިދައެއް އެއްވެސް ކަމެއްގައި ބޭނުންކޮށްގެނެއް ނުވާނެ ކަމަށްވެސް ކަނޑައަޅާފައި ވެއެވެ.

ދެންނެވުމުގައިވާ ގޮތުން އެހެން ދިދައަކާ ކައްތިރިކޮށް ދިވެހި ގައުމީ ދިދަ ނެގިދާނެ އެވެ. ނަމަވެސް ދިވެހި ދިދައާއެކު ކައްތިރިކޮށް އެހެން ގައުމެއްގެ ގައުމީ ދިދަ ނެގޭނީ، އެ ގައުމަކީ މިނިވަން ގައުމެއް ކަމަށްވާނަމަ އެވެ.

ގައުމީ ދިދަ އެހެން ދިދައަކާ ނުވަތަ ދިދަތަކަކާ އެއްވަލެއްގައި ނުވަތަ އެއް ފަށެއްގައި ނަގާނަމަ، ދިވެހި ގައުމީ ދިދަ ހިމެނޭ ދިދަފަތި ހުންނަންޖެހެނީ އެންމެ މަތީގަ އެވެ. އަދި އެފަދަ ވަލަކަށް ނުވަތަ ފަށަކަށް ދިވެހި ގައުމީ ދިދަ ނަގާނަމަ އެންމެ ކުރިން ނަގަންޖެހެނީ ވެސް ދިވެހި ގައުމީ ދިދަ ނުވަތަ ދިވެހި ހައުމީ ދިދަ ހިމެނިގެންވާ ދިދަ ފައްޗެވެ.

ދައުލަތުގެ މުއައްސަސާއެއްގެ ނުވަތަ އެހެން ގައުމެއްގެ ނުވަތަ ދިވެހި ސަރުކާރުން ގަބޫލުކުރާ ބައިނަލްއަގްވާމީ ޖަމާއަތެއްގެ ދިދައާއެކު ދިވެހި ގައުމީ ދިދަ ނަގާ ތަންތަނުގައި ދިވެހި ގައުމީ ދިދަ ހުންނަންޖެހެނީ އެ ނޫން ދިދަތަކާ އެއް އުސްމިނެއްގައި އަދި އެ ދިދަތަކާ އެއް މިނަކަށެވެ.

ގައުމީ ދިދަ ބައިދަނޑިއަށް ތިރިކުރުމުގެ ހަމަތައް

- ގައުމީ ފެންވަރެއްގައި ހިތާމަ ފާޅުކުރުމުގެ ނިޝާނެއްގެ ގޮތުން ރައީސުލްޖުމްހޫރިއްޔާގެ އެންގުމަކަށް ގައުމީ ދިދަ ބައިދަނޑިއަށް ތިރިކުރެވިދާނެ. ދިދަ ބައިދަނޑިއަށް ތިރިކޮށްފައިވާ ކަމުގައި ބަލާނީ ދިދަ ދަނޑީގެ ކުރިން ފެށިގެން ދިދައިގެ ފުޅާމިނަށް ތިރިކޮށްފައި ބެހެއްޓުމުން
- ގައުމީ ދިދަ ބައިދަނޑިއަށް ނަގަންވެއްޖެނަމ ދިދަ ނަގާނީ އެ ދިދަ ނެގޭ ދަނޑިއެއްގެ ކުރިއަށް ދިދަ ނެގުމަށްފަހުގަ އެވެ. އަދި ބައިދަނޑިއަށް ހުރި ދިދައެއް ތިރިކުރާނީވެސް ފުރިހަމަ ދަނޑިއަށް ދިދަ ނެގުމަށްފަހު
- ގައުމީ ދިދަ ބައިދަނޑިއަށް ނަގާ ހާލަތްތަކުގައި ގައުމީ ދިދައާއެކު އެހެން ދިދައެއް ނުވަތަ ދިދަތަކެއް ނަގައިފައިވާނަމަ އެ ދިދައެއް ނުވަތަ އެ ދިދަތަކެއްވެސް ބަހައްޓަންވާނީ ބައިދަނޑިއަށް ތިރިކޮށްފަ
- ގައުމީ ދިދަ ބައިދަނޑިއަށް ތިރިކޮށްފައި ބެހެއްޓުމުގައި ހެނދުނު 6:00 އިން ހަވީރު 6:00 އަށް ދިދަ ނަގާ ތަންތަނުގައި ދުވަސް ނިންމާނީ ހަވީރު 6:00 އަށް. 24 ގަޑިއިރު ދިދަ ނަގައިފައި ބަހައްޓާ ތަންތަނުގައި ދުވަސް ނިންމާނީ ރޭގަނޑު 12:00 އަށް