ހަބޭސް ބޮޑުބެރު ގުރޫޕްގެ ފޯރިގަދަ ޝޯއެއް ކުޅުދުއްފުށީގައި

މަޝްހޫރު ބޮޑުބެރު ގުރޫޕް، ހަބޭސް ބޮޑުބެރު ގުރޫޕްގެ ފޯރިގަދަ ޝޯއެއް މިއަހަރުގެ ބޮޑު އީދުގައި ކުޅުދުއްފުށީގައި ބާއްވަން ހަމަޖެހިއްޖެ އެވެ.

ރައްޔިތުންގެ އީދު އުފާ - ކުޅުދުއްފުށި ސިޓީ އުތުރުގެ މިނަމުގައި ކުރިއަށްގެންދާ ސްޓޭޖް ޝޯގައި ހަބޭސް ބޮޑުބެރު ގުރޫފް ކުޅުމަށް ހަމަޖެހިފައިވަނީ 11 ވަނަ ދުވަހުގެ ރޭގަނޑު އެވެ.

އެކަން އިންތިޒާމުކުރާ ފަރާތުން ބުނީ، ހަބޭސްގެ އިތުރުން އިތުރު ހުށަހެޅުންތަކެއްވެސް ފެނިގެންދާނެ ކަމަށެވެ. އެގޮތުން އީދުގެ ފުރަތަމަ ދުވަހުގެ ރޭ ދައްސޫރަ ބޮޑުބެރުގެ ގުރޫފްގެ ހުށަހެޅުންތަކެއް ފެނިގެންދާއިރު ދެވަނަ ރޭ ދައުވަތު ބޭންޑްގެ ހުށަހެޅުންތަކެއް ކުރިއަށްދާނެ ކަމަށެވެ.

ހަބޭސް ބޮޑުބެރު ގުރޫފްގެ ހުށަހެޅުންތައް އޮންނާނީ ތިންވަނަ ދުވަހުގެ ރޭ ކަމަށް އެ ފަރާތުން މައުލޫމާތު ދިނެވެ. އަދި ތިން ރޭވެސް އެކްސްޓްރީމް ލެވެލް ނަމަކަށް ކިޔާ ނަށާ ގުރޫޕެއްގެ ހުށަހެޅުންތައް ފެނިގެންދާނެ ކަމަށް އެ ފަރާތުން މައުލޫމާތުދެ އެވެ.

ބަނދަރު އެތުމާ ފުރަގަހުގައި ހަދާފައިވާ މި ސްޓޭޖް ކައިރީގައި މިރޭ ރައްޔިތުންނަށް ހުޅުވާލައިގެން ބާއްވާ ބާބަކިއުއެއް އޮންނައިރު 11 ވަނަ ދުވަހު ހަވީރު ހަމަ އެ ސަރަހައްދުގައި ކުޑަކުދިންގެ ހަވީރެއް އޮންނާނެކަމަށް އެފަރާތުން މައުލޫމާތުދެ އެވެ.