ކޮމިއުނިޓީ ފަންޑުގެ އެހީ ލިބޭ މަޝްރޫއުތައް ހޮވައިފި

ބޭންކް އޮފް މޯލްޑިވްސް (ބީއެމްއެލް)ގެ ކޮމިއުނިޓީ ފަންޑުގެ ދަށުން މިއަހަރުގެ ދެވަނަ ކުއާޓަރުގައި އެހީ ދޭނެ މަޝްރޫއުތައް ކަނޑައަޅައިފި އެވެ.

ބީއެމްއެލް އިން ބުނީ ކޮމިއުނިޓީ ފަންޑުގެ އެހީ ހޯދުމަށް ހުށަހަޅާފައިވާ ޕްރޮޖެކްޓްތަކުގެ ތެރެއިން އެންމެ ރަގަޅު ފަސް ޕްރޮޕޯސަލް ހޮވާފައިވާ ކަމަށެވެ.

ކޮމިއުނިޓީ ފަންޑަކީ ހިލޭ ސާބަހަށް މަސައްކަތް ކުރާ ޖަމިއްޔާތަކުން ރަށްރަށުގައި ހިންގަން ބޭނުންވާ މަޝްރޫއުތަކަށް މާލީ އެހީތެރިކަން ފޯރުކޮށްދިނުމަށް ބީއެމްއެލް އިން ހުޅުވާލާފައިވާ ފަންޑެކެވެ.

މި ގޮތުން ދެވަނަ ކުއާޓަރުގައި އެހީ ދިނުމަށް ނިންމާފައިވާ މަޝްރޫއުތަކުގެ ތެރޭގައި ހިމެނެނީ އއ. ހިމަންދޫއާއި ހދ. ނޭކުރެންދޫއާއި ދ. ހުޅުދެލީގައި މަސްކެނޑުމަށް ހާއްސަ ތަނެއް ގާއިމްކުރުމަށާއި އއ. ބޮޑުފުޅަދޫ ސްކޫލުގައި އާރްއޯ މެޝިނަކާއި ފެން ޑިސްޕެންސަރެއް ބެހެއްޓުމަށާއި، އދ. ފެންފުށީގައި ޕްރޯސްކޫލު ޕާކެއް ތަރައްގީކުރުމަށެވެ.

ބީއެމްއެލްއިން ބުނީ މިހާތަނަށް ކޮމިއުނިޓީ ފަންޑުގެ ދަށުން 70 ޕްރޮޖެކްޓް ހިންގުމަށް ފައިސާގެ އެހީ ވަނީ ފޯރުކޮށްދެވިފަވާނެ ކަމަށެވެ. ކޮމިއުނިޓީ ފަންޑުގެ ދަށުން މިއަހަރު އިތުރު 10 ޕްރޮޖެކްޓް އަށް އެހީތެރިކަން ފޯރިކޮށްދިނުމަށް ވަނީ ހަމަޖެހިފަ ކަމަށެވެ.