ހާފް މެރަތަންގެ ޑިޖިޓަލް ޕާޓްނަރަކަށް އުރީދޫ

މޯލްޑްވިސް ހާފް މެރަތަން 2022ގެ ޑިޖިޓަލް ޕާޓްނަރަކަށް އުރީދޫ ހަމަޖައްސައިފިއެވެ.

އަންނަ ހުކުރު އަދި ހޮނިހިރު ދުވަހު ހުޅުމާލޭ ސެންޓްރަލް ޕާކުގައި ކުރިއަށް ގެންދިއުމަށް ހަމަޖެހިފައިވާ ހާފް މެރެތަން އިވެންޓުގައި އެކި ހަރަކާތްތައް ކުރިއަށް ގެންދިއުމަށް ހަމަޖެހިފައިވެއެވެ.

އެ މެރެތަންގައި 15 ކިލޯމީޓަރާއި، 10 ކިލޯމީޓަރު އަދި ފަސް ކިލޯމީޓަރުގެ ފަން ރަންއާއި އިންލައިން ސްކޭޓިންއާއި ވީލްޗެއާ ރޭސް ކުރިއަށް ގެންދިއުމަށް ވަނީ ހަމަޖެހިފައެވެ.

މޯލްޑިވްސް ހާފް މެރަތަންގެ ރޭސް ޑައިރެކްޓަރު ހުސައިން ޝުޖާއު ވިދާޅުވީ، މިއީ ކޮވިޑް-19 އަށްފަހު އުރީދޫއިން ބާއްވާ ފުރަތަމަ ބޮޑު އިވެންޓް ކަމަށެވެ.

"މޯލްޑިވްސް ހާފް މެރަތަން 2022 ލޯންޗް ކުރުމަކީ ލިބޭ ވަރަށް ބޮޑު ހިތްވަރެއް. މި ދުވުމުގައި ދުނިޔޭގެ އެކި ކަންކޮޅުތަކުގައި ތިބި ދުވުންތެރިން ވެސް ރާއްޖެއަށް ޒިއާރަތްކޮށް ރޭސް ދުވުމުގައި ބައިވެރިވުމުގެ ފުރުސަތު އެބަ އޮތް،" އޭނާ ވިދާޅުވިއެވެ.

އެ ދުވުމުގައި ބައިވެރިވާ މީހުންނަށް އެ ދުވުމުގެ ކިޓް މޫލީ މެދުވެރިކޮށް ލިބޭނެއެވެ. އެގޮތުން ދުވުމުގައި ބައިވެރިވާ މީހުންނަށް އުރީދޫއިން ޓީޝާޓް ޑެލިވާކޮށް ދޭނެއެވެ. އަދި ދުވުން ފުރިހަމަ ކުރުމުން އެ މީހުންނަށް މެޑަލްތައް ވެސް މޫލީ މެދުވެރިކޮށް ހަވާލުކޮށްދޭނެ ކަމަށް އުރީދޫއިން ބުންޏެވެ.