ޝިއާއު މަރާލުމަށްފަހުވެސް ހަމަލާދިންކަން ޕޯސްޓްމޯޓަމުން އެނގޭ: ފުލުހުން

އޮގަސްޓު މަހުގެ 7 ވަނަ ދުވަހުގެރޭ ރަހުމްކުޑަގޮތަކަށް މަރާލާފައި އޮއްވައި ފެނުނު ޝިއާއު މުހައްމަދު ސައީދު (ޝިއާ) ނިޔާވި ފަހުން ގިނަ އަނިޔާތަކެއް ދީފައިވާކަމަށް ފުލުހުން ބުނެފި އެވެ.

ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޗީފް ސްޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވީ ޝިއާއު މަރުވިފަހުންވެސް އޭނާގެ ހަށިގަނޑަށް ބޮޑެތި އަނިޔާތަކެއް ދީފައިވާކަން ޕޯސްޓް މޯޓަމް ރިޕޯޓުން ހާމަވާކަމަށެވެ.

"އިންޑިއާ އަށް ފޮނުވައިގެން ޕޯސްޓްމޯޓަމް ހެދިއިރުގައި ޕޯސްޓްމޯޓަމްގެ މައުލޫމާތުތަކުންނާއި އަދި އަޅުގަނޑުމެން ސީން އޮފް ކްރައިމުން މި މައްސަލަ ބެލިއިރު ލިބުނު މައުލޫމާތުގެ އަލީގައި ކަށަވަރުކޮށް ދަންނަވަން އެނގޭ އެއް ކަމަކީ ޝިއާއު މުހައްމަދު މަރުވި ފަހުން ވެސް ހަށިގަނޑަށް ބޮޑެތި އަނިޔާތަކެއް ދީފައިވާކަން. އެ ކަން އަޅުގަނޑުމެންނަށް މިހާރު އެސްޓެބްލިޝް ކުރެވޭ،" ފެމިލީ އެންޑް ޗައިލްޑް ޕްރޮޓެކްޝަންގެ ހެޑް، ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ބަޝީދު ވިދާޅުވި އެވެ.

ޝިއާއުގެ މަރާ ގުޅިގެން ފުލުހުން މިއަދު ވިދާޅުވީ މިމައްސަލާގައި މިހާތަނަށް 45 މީހަކާއި ސުވާލު ކުރެވިފައިވާކަމަށާ، ޝާހިލްގެ ފޯނު ފުލުހުންގެ ބެލުމުގެ ދަށަށް ގެންގޮސް ފޯނުގައިހުރި މައުލޫމާތުވެސް އެއްކުރަމުންދާކަމަށް ފުލުހުން މިއަދު ވިދާޅުވިއެވެ. އަދި މިމައްސަލާގައި ތުހުމަތު ކުރާ ޝާހިލުގެމައްޗަށް ކުށް ސާބިތު ކުރެވޭނެކަމުގެ ޔަޤީންކަން އެބައޮތްކަމަށް ފުލުހުން ވިދާޅުވިއެވެ. އެހެންނަމަވެސް މިހާތަނަށް ޝާހިލްގެ ފަރާތުން ތަހްގީގަށް މާބޮޑު އެއްބާރުލުމެއް ލިބިފައި ނުވާކަމަށް ފުލުހުން ވިދާޅުވިއެވެ.

މި މައްސަލައިގައި މޯޓިވް ނުވަތަ ޝިއާއު އަށް ހަމަލަދިން ސަބަބު ވަރަށް ބޮޑަށް މުހިންމު ވާތީ އެ ކަން ދެނެގަންނަން މިހާރު މަސައްކަތް ކުރާ ކަމަށެވެ. ނަމަވެސް، މިހާތަނަށް އަދި ޝިއާއުގެ މަރުގެ މޯޓިވް ނޭނގޭ ކަމަށް ފުލުހުން ބުންޏެވެ.

ފުލުހުން ބުނީ ޝިއާއު މަރާލި މައްސަލައިގެ ތަހުގީގު ނިންމައި ދައުވާ ކޮށްދިނުމަށް އެދި ޕްރޮސެކިއުޓަ ޖެނެރަލްގެ އޮފީހަށް ކުރިއަށް އޮތް ދެ ހަފުތާގެ ތެރޭގައި ހުށަހެޅޭނެ އެވެ.