ބީއެމްއެލްގެ ހެކަތަން ކާމިޔާބުކުރި ފަރާތްތައް ހޮވައިފި

ނަބީލާ އިސްމާޢީލް

Oct 17, 2022

ކަސްޓަަމަރުންނަށް ދޭ ހިދުމަތުގެ ފެންވަރު ރަނގަޅުކޮށްދޭނެ އުފެއްދުންތަކެއް އީޖާދުކުރުމަށް އަމާޒުކޮށްގެން ބޭންކް އޮފް މޯލްޑިވްސް (ބީއެމްއެލް) އިން ކުރިއަށް ގެންދިޔަ ހެކަތަން ރޭ ނިންމާލައި އެންމެ އީޖާދީ ތިން ހިޔާލު ހޮވައިފި އެވެ.

މިދިޔަ ހުކުރު ދުވަހު ފެށި ހެކަތަންގައި ފިންޓެކްގެ ދާއިރާ އިން އީޖާދީ ހިޔާލުތަކާއި ހައްލުތައް ވަނީ ހުށަހަޅާފަ އެވެ.

އޭގެ ތެރެއިން، ހެކަަތަން ކާމިޔާބުކުރި ތިން ޓީމަކީ:

އަހުމަދު މަހުފޫޒު، ހުސައިން ޒަޔާން އަދި މޫސާ އިރުޝާން – ހުށަހަޅާފައިވަނީ ޑިޖިޓަލް އޮންބޯޑިން
މުހައްމަދު އާތިކް އަލީ ރިޒާ، ފާތިމަތު އަރީން ނަސީމް އަދި މުހައްމަދު ޔާނިއު ރަމީޒު – ހުށަހަޅާފައިވަނީ އެކްސްޕެންސް ޓްރެކާ
މުހައްމަދު ޖައިލަމް، އިބްރާހިމް ހުސައިން ޝަރީފް އަދި މުހައްމަދު އީމާން – ހުށަހަޅާފައިވަނީ ޕާސަނަލް ފައިނޭންސް މެނޭޖާ

ބީއެމްއެލްގެ އިންޗާޖް އަދި އެކްޓިން އެމްޑީ އާއިޝަތު ނޫރައްދީން ވިދާޅުވީ މި ހެކަތަން މެދުވެރިކޮށް، ކަސްޓަމަރުންނަށް ފެންވަރު ރަނގަޅު ހިދުމަތްތަކެއް ފޯރުކޮށްދިނުމަށް ޑިވެލޮޕަރުންގެ ފަރާތުން މޮޅު ހިޔާލުތަކެއް ލިބިފައިވާ ކަމަށެވެ.

"ފިންޓެކް ކޮމިއުނިޓީގެ ފަރާތުން މި ހެކަތަންއަށް ދެއްވި ޝައުގުވެރިކަމަކީ އަޅުގަނޑުމެން ވަރަށް އުފަލާ އެކު ބަލައިގަންނަ ކަމެއް. ހުށަހެޅި ހިޔާލު ހަގީގަތަކަށް ހެދުމަށްޓަކައި ހެކަތަން ކާމިޔާބުކުރި ފަރާތްތަކަށް އަޅުގަނޑުމެންގެ އިނޮވޭޝަން ލެބްއަށް މަރުހަބާ ކިޔަން،" އޭނާ ވިދާޅުވި އެވެ.

"މި ހެކަތަންގައި ބައިވެރިވި ހުރިހާ ފަރާތްތަކަށް ޝުކުރު އަދާކުރަން އަދި ހެކަތަންގެ ހިޔާލު ހަގީގަތަކަށް ހެދުމަށް މަސައްކަތްކޮށްދެއްވި މެންޓާސްއަށް ހާއްސަ ޝުކުރެއް އަޅުގަނޑު އަދާކުރަން."

ހެކަތަންގައި ހޮވޭ 3 ޓީމުން ހުށަހަޅާ ހިޔާލު ކާމިޔާބުކަމާއެކު ނިންމާލުމަށް ބީއެމްއެލް އިނޮވޭޝަން ލެބްގައި މަސައްކަތްކުރުމަށް 6 މަސް ދުވަހުގެ މުއްދަތެއް ލިބޭނެއެވެ. މި މުއްދަތުގައި ބޭންކުގެ ފަރާތުން ތިރީގައިވާ ކަންކަން ފުރިހަމަކޮށްދިނުމަށް ވަނީ ހަމަޖެހިފައެވެ.