ޖަޕާނުން ސްޕެއިން ސިއްސުވާލިއިރު ޖަރުމަނު މުބާރާތުން ކަޓައިފި

ފީފާ ވޯލްޑް ކަޕުގައި ރޭ އޭޝިއާގެ ޖަޕާނުން ފުޓްބޯޅައިގެ ގަދަބާރު ސްޕެއިން ބަލިކުރިއިރު ހަތަރު ފަހަރުގެ ޗެމްޕިއަން ޖަރުމަނު ޖެހިޖެހިގެން ދެ ވޯލްޑްކަޕުގެ ގްރޫޕް ސްޓޭޖުން ކަޓައިފި އެވެ.

ރޭ ޖަޕާނުން ވަނީ ސްޕެއިން 2 - 1 ންް ބަލިކޮށް މުޅި ދުނިޔެއަށް ސިހުން ގެނުވާފަ އެވެ. މީގެ ކުރިން ޖަޕާނުން ވަނީ ފުރަތަމަ މެޗުގައި ޖަރުމަނު ވެސް ބަލިކޮށްފަ އެވެ. ޖަޕާން ދެވަނަ ބުރަށް ދަތުރުކުރީ ގްރޫޕް އީގެ އެއްވަނަ ޓީމުގެ ގޮތުގައި 6 ޕޮއިންޓާއެކު އެވެ.

ދެވަނައިގައި އޮތް ސްޕެއިނާއި 3 ވަނައިގައި އޮތް ޖަރުމަނަށް ލިބިފައިވަނީ 4 ޕޮއިންޓެވެ. ސްޕެއިން ދެވަނަ ބުރަށް ދަތުރުކުރީ ފަިދާ ގޯލުގެ ތަފާތުން ކުރި ހޯދައިގެންނެވެ. ފުލުގައި އޮތް ކޮސްޓަ ރިކާއަށް ލިބުނީ 3 ޕޮއިންޓެވެ.

ސްޕެއިންއާއި ޖަޕާން ބައްދަލުކުރި މެޗުގައި ރޭ ފުރަތަމަ ލަނޑު ޖަހާ ލީޑު ނެގީ ސްޕެއިނުންނެވެ. 11 ވަނަ މިނެޓުގައި އަލްވާރޯ މޮރާޓާ ލަނޑު ޖެހިއިރު ފުރަތަމަ ހާފު ނިމުނީ ސްޕެއިން ކުރީގައި އޮވެގެންނެވެ. ދެވަނަ ހާފު ފެށިގެން 3 ވަނަ މިނެޓުގައި ރިޓްސޫ ޑޯން ވަނީ ޖަޕާނަށް ނަތީޖާ ހަމަހަމަކޮށްދީފަ އެވެ.

އޭގެ 2 މިނެޓު ފަހުން އައޯ ޓަނަކާގެ ލަނޑުން ޖަޕާނުން މެޗުގެ ނަތީޖާ އަނބުރާލި އެވެ. މެޗުގައި މޮޅަށް ކުޅުނީ ސްޕެއިނުން ކަމުގައިވީ ނަމަވެސް ލަނޑެއް ޖެހޭ ގޮތެއް ނުވި އެވެ.

ރޭގެ އަނެއް މެޗުގައި ޖަރުމަނާއި ކޮސްޓަ ރިކާ ބައްދަލުކުރި މެޗު 4 - 2 ން ކާމިޔާބު ކުރީ ޖަރުމަނުންނެވެ. 10 ވަނަ މިނެޓުގައި ސާޖް ގްނެބްރީ ޖަރުމަނުން ލީޑު ނެގިއިރު ޔެލްޓްސިން ޓެޖެޑާ ވަނީ 58 ވަނަ މިނެޓުގައި ނަތީޖާ ހަމަހަމަ ކޮށްދީފަ އެވެ.

70 ވަނަ މިނެޓުގައި މެނުއަލް ނޯޔާ އަތުން ބައިކޮޅަށް ގޯލެއް ވަންއިރު 73 ވަނަ މިނެޓުގައި ކައި ހަވާޓްޒް ޖަރުމަނަށް އެއްވަރުކޮށްދިނެވެ. 85 ވަނަ މިނެޓުގައި ހަވާޓްޒް އެޓީމަށް އަލުން ލީޑު ނަގައިދިންއިރު އޭގެ 3 މިނެޓުފަހުން ނިކްލަސް ފުލްކްރަގް އެޓީމަށް ލީޑު ފުޅާކޮށްދިނެވެ.

މިރޭ ކުޅެވޭ މެޗުތަކަށް ބަލާއިރު 8 ޖަހާއިރު ސައުތް ކޮރެއާއާއި ޕޯޗުގަލް އަދި ގާނާއާއި އުރުގުއޭ ބައްދަލުކުރާނެ އެވެ.