ބޮޑު ތަފާތަކުން އެމްޑީޕީގެ މަތި އުތުރު ޕްރޮވިންސްގެ ރައީސްކަމަށް އަކްރަމް

އެމްޑީޕީގެ މަތިއުތުރު ޕްރޮވިންސްގެ ރައީސްކަން ބޮޑު ތަފާތަކުން ޕްލޭނިން އެންޑް ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ކާމިޔާބުކުރައްވައިފި އެވެ.

އެންމެ އުތުރުގެ ތިން އަތޮޅު ހިމެނޭ މަތި އުތުރު ޕްރޮވިންސްގެ ރައީސްކަން އަކްރަމް ހޯއްދެވީ ހެލްތު މިނިސްރީގެ ސްޓޭޓް މިނިސްޓަރު އަހުމަދު އާދިލާއި ހެރިޓޭޖު މިނިސްޓްރީގެ ސީނިއާ ޕޮލިސީ ޑިރެކްޓަރު އަހުމަދު ހާޝިމް (ޓިންޓިން)އާ ވާދަކޮށް ބޮޑު ތަފާތަކުން ކުރި ހޯއްދަވައިގެންނެވެ.

އެމްޑީޕީގެ މަތި އުތުރު ޕްރޮވިންސްގައި ހިމެނޭ އަތޮޅުތަކަކީ ހއ. އަތޮޅު، ހދ. އަތޮޅު އަދި ށ. އަތޮޅެވެ.

ތިން އަތޮޅުގެ 40 ރަށެއްގައި ކުރިއަށް ގެންދިޔަ އެ އިންތިހާބުގައި އަކްރަމްއަށް ލިބިވަޑައިގަތީ 2988 ވޯޓެެވެ. އޭނާއާ އެންމެ ކައިރި ކުރެއްވި އާދިލަށް ލިބިވަޑައިގަތީ 804 ވޯޓެވެ. ހާޝިމަށް ލިބިލެއްވީ 262 ވޯޓެވެ.

މަތި އުތުރު ޕްރޮވިންސްގެ ރައީސްގެ މަގާމަށް ކުރިމަތިލުމަށް މިދިޔަ މަހު ހުޅުވާލާފައިވަނީކުރިން އެ މަގާމުގައި ހުންނެވި އިބްރާހިމް ވަހީދު (އިބުރޭ) އެމްޑީޕީގެ ޑެޕިއުޓީ ޗެއާޕާސަންގެ މަގާމަށް އިންތިހާބުވުމާ ގުޅިގެންނެވެ.