ކުނި މެނޭޖްކުރުމަށް ޖަޕާން ސަރުކާރުން 80 މިލިއަން ރުފިޔާ ދެނީ

ދެމެހެއްޓެނިވި ގޮތެއްގައި ރާއްޖޭގެ ކުނި މެނޭޖް މެނޭޖް ކުރަން ޖަޕާނު ސަރުކާރުން 5.4 މިލިއަން ޑޮލަރު ދިނުމުގެ އެއްބަސްވުމެއްގައި ސޮއިކޮށްފި އެވެ.

މި އެއްބަސްވުމުގައި ރާއްޖޭގެ ފަރާތުން ސޮއި ކުރެއްވީ ފޮރިން މިނިސްޓްރީގެ ސްޓޭޓް މިނިސްޓަރު އަހުމަދު ހަލީލެވެ. ޖަޕާނު ސަރުކާރުގެ ފަރާތުން ސޮއި ކުރެއްވީ އެ ގައުމުގެ ފޮރިން މިނިސްޓްރީގެ ސްޓޭޓް މިނިސްޓަރު ޓަކައި ޝުންސޫކޭ އެވެ.

މި އެއްބަސްވުމުގެ ދަށުން ޖަޕާނު ސަރުކާރުން ދެނީ 700 މިލިއަން ޔެން އެވެ. އެއީ ދިވެހި ރުފިޔާއިން ބަލާނަމަ ގާތްގަނޑަކަށް 83 މިލިއަން ރުފިޔާ އެވެ.

މި އެއްބަސްވުމުގެ ދަށުން ރާއްޖޭގައި ކުނި އެއްކުރުމާއި ނައްތާލުމަށް ހަރަދު ކުރާނެ އެވެ. އަދި ރަށްރަށުގައި ކުނި މެނޭޖް ކުރުމަށް ބޭނުންވާ ވަސީލަތްތަކާއި ވެހިކަލްތައް މި ހިލޭ އެހީގެ ދަށުން ފޯރު ކޮށްދޭނެ އެވެ. ޖަޕާނު ސަރުކާރުން މި ފައިސާ ދޫކުރާނީ ރާއްޖޭގައި އިގްތިސޯދީ އަދި އިޖުތިމާއީ ކުރިއެރުމަށް ހިންގާ ޕްރޮގްރާމްގެ ދަށުންނެވެ.

ރާއްޖެއަށް ދިމާވެފައިވާ އެންމެ ބޮޑު އެއް މައްސަލައަކީ ކުނި މެނޭޖް ކުރުމަށް ދިމާވެފައިވާ ބޮޑެތި ގޮންޖެހުންތަކުގެ މައްސަލަ އެވެ.