ބިންހެލުމުގައި ތުރުކީގެ ގޯލް ކީޕަރު އަހްމަތު ޔޫޕް މަރުވެއްޖެ

މިދިޔަ ހޯމަ ދުވަހު ތުރުކީއާއި ސީރިއާ ގުޅޭ ބޯޑަރު ކައިރިއަށް އައި ބާރުގަދަ ބިން ހެލުމުގައި ތުރުކީގެ ގޯލްކީޕަރެއް ކަމަށްވާ އަހްމަތު ޔޫޕް ތުރުކަސްލާން މަރުވެއްޖެއެވެ. އެކަން އޭނާގެ ކްލަބް ޔެނީ މަލަތިއަސްޕޯރްއިން ކަށަވަރުކޮށްދީފައިވާކަމަށް ރިޕޯޓްތައް ބުނެ އެވެ.

އެ ސަރަހައްދަށް އައި ބިންހެލުމަކީ ރެކްޓާ މިންގަނޑުން 7.8 މެގްނިޓިއުޑުގެ ބާރުގަދަ ބިންހެލުމެކެވެ.

ކްލަބް ޔެނީއިން ކުރި ޓްވިޓެއްގައި ބުނީ ގޯލްކީޕަރު އަހްމަތު ޔޫޕް ތުރުކަސްލާން މަރުވީ ބިންހެލުމުގެ ސަބަބުން ވެއްޓުނު އިމާރަަތުގެ ދަށު ވެގެންކަމަށާއި އެ ކުޅުންތެރިޔާ މަތިން ހަނދާން ނައްތާ ނުލެވޭނެ ކަމަށެވެ.

ތުރުކީ އާއި ސީރިއާގެ އޮފިޝަލުން ވިދާޅުވާ ގޮތުގައި ބިންހެލުމުގައި ގާތްގަނޑަކަށް 8،000 މީހުން މަރުވެ، 40،000 އަށް ވުރެ ގިނަ މީހުން ވަނީ ޒަހަމްވެފައެވެ. މަރުވި މީހުންގެ އަދަދު އިތުރުވާނެ ކަމަށް ރިޕޯޓްތައް ބުނެ އެވެެ.