ތެޔޮ ބިލުތަކަށް ފައިސާ ދައްކައިފިން: އިމްރާން

ކުޅުދުއްފުށީގައި ފުލުހުން ބޭނުންކުރާ ވެހިކަލްތަކަށް ތެޔޮ އަޅާފައި ބިލުތަކަށް ފައިސާ ނުދައްކާތީ ތެޔޮ އަޅައިދިނުން މެދުކެނޑުނު ވާހަކަ ހޯމް މިނިސްޓަރު އިމްރާން މިއަދު ދޮގުކުރައްވައިފި އެވެ.

"ފައިސާ ނުދައްކައިގެން ކުޅުދުއްފުށީގައި ދުއްވާ ފުލުހުންގެ ވެހިކަލުތަކަށް ޕެޓްރޯލު ވިއްކުން ހުއްޓާލައިފި" މި ސުރުހީގެ ދަށުން އިއްޔެ ކޭއޯއަށް ޝާއިރުކުރި ހަބަރަށް މައުލޫމާތު ނަގާފައިވަނީ ކަމާ ގުޅުން ހުރި އިތުބާރު ހުރި މަސްދަރުތަކުންނެވެ. ފުލުހުންނަށް ތެޔޮ ވިއްކާ އެތުމާ އާއި ފުލުހުންގެ ބަހެއް ހޯދުމަށްވެސް މަސައްކަތްކުރިނަމަވެސް ހަބަރު ޝާއިރުކުރާ ހަމައަށް އެ ފަރާތުގެ ބަހެއް ވަނީ ނުލިބި އެވެ.

ހަބަރު ޝާއިރު ކުރި ފަހުން ކޭއޯއަށް ފުލުހުން ވިދާޅުވީ، ތެޔޮ ވިއްކުން ހުއްޓާލާފައިނުވާ ކަމަށެވެ. އެހެންނަމަވެސް އިތުރު ތަފްސީލެއް ނުދެއްވަ އެވެ. ކޭއޯއަށް އިތުބާރު ހުރި ފަރާތްތަކުން މައުލޫމާތުދީފައިވާ ގޮތުގައި ތެޔޮ ދޫކުރުން ދެ ދުވަހަށް މެދުކެނޑުނެވެ. މެދުކެނޑިފައި އޮތުމަށްފަހު އިއްޔެ ހަވީރު 16:30 ގައި ފުލުހުންގެ ހުރިހާ ވެހިކަލެއް އެތުމާގެ ތެޔޮ ޝެޑަށް ގެންގޮސް ތެޔޮ އެޅި މަންޒަރުން ފެނުނެވެ.

ފުލުހުންނަށް ދޫކޮށްފައިވާ ކުރެޑިޓް ލިމިޓްހަމަވެ ތެޔޮ ދޫކުރުން ލިމިޓްކޮށްގެން ދޫކުރަން ފެށިފަހުން ރަށު ތެރެ ޕެޓިރޯލުކުރުމުގައިވެސް މަޑުޖެހުމެއް އައިކަމަށް މައުލޫމާތު އެނގޭ އިތުބާރު ހުރި މަސްދަރުތަކުން ކޭއޯއަށް ކިޔައިދީފައިވެ އެވެ. އެތުމާއަށް ދައްކަން ޖެހޭ ބިލުތަކަށް 5 ލައްކަ ރުފިޔާއަށްވުރެ ބޮޑު އަދަދެއް އަރާފައިވާކަމަށް މައުލޫމާތު ލިބެ އެވެ.

ރައްޔިތުންގެ މަޖިލީހުގައި ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުލް ލަތީފު ކުރެއްވި ސުވާލަކަށް ޖަވާބު ދެއްވަމުން މިނިސްޓަރ ވިދާޅުވީ ފައިސާ ނުދެއްކިގެން ކުޅުދުއްފުށީ ފުލުހުންގެ ވެހިކަލްތަށް ޕެޓްރޯލް ވިއްކުން ހުއްޓާލިކަމަށް ލިޔެފައިވާ ހަބަރުތަކަކީ ރަނގަޅު މައުލޫމާތު ނޫންކަމަށެވެ.

"21 މާޗްގައި މި މާލަމުގައި ކުޅުދުއްފުށީ ޕޮލިސް ސްޓޭޝަންގެ ދަތިތަކާގުޅޭ ގޮތުން މިނިސްޓަރުގެ ޖަވާބުގައި ވިދާޅުވެފައިވަނީ ކުޅުދުއްފުށީގައި ފުލުހުންގެ ހިދުމަތް އިތުރަށް ފުޅާކުރުމަށް، ހަރުދަނާ ކުރުމަށް މަސައްކަތްކުރެވޭ ވާހަކައާއި އަދި ޖާގައިގެ ދަތިކަން ހައްލުކުރުމަށްޓަކައި އިމާރާތުގެ މަސައްކަތް ކުރިއަށްދާކަމަށް، އިއްޔެގަ އަޅުގަނޑަށް ހަބަރުތަކުން ފެނުނީ ހުރިހާ ވެހިކަލްތަކެއް ޕެޓްރޯލް ނޭޅިގެން ހުއްޓިފަހުރި މަންޒަރު ބިލްތަކަށް ފައިސާ ނުދެއްކިގެން، މިއަދު އަޅުގަނޑު ބަލާލާއިރު އެކަށީގެންވާ އަދަދަކާ ގާތަށްވެސް މުވައްޒަފުންނެއް ނެތް. އެހެންވީމަ އަޅުގަނޑުގެ ސުވާލަކީ ކޮބާތޯ ދިމާވާ މައްސަލައަކީ، ހަގީގީ މައްސަލައަކީ ކޮބާތޯ؟ އަދި މި އިމާރާތުގެ މަސައްކަތް މިހާރު ގޮސްފައިވާ ހިސާބަކީ ކޮބާތޯ؟" ޔާސިރު ވިދާޅުވި އެވެ.

ޔާސިރުގެ ސުވާލަށް ޖަވާބު ދެއްވާ މިނިސްޓަރު އިމްރާން ވިދާޅުވީ ކުޅުދުއްފުށީ ޕޮލިސް ރީޖަނަލް ހެޑްކުއާޓަރގެ އެކްސްޓެންޝަން މި ޕްރޮޖެކްޓްގެ ތެރޭގައި ހިމެނޭކަމަށާއި އެހެންކަމުން އެކަން އެގޮތަށް ހިނގާނެ ކަމަށް ގަބޫލުކުރައްވާކަމަށެވެ. އެކަމަކު ނޫހުގައި އިއްޔެގައި ހިދުމަތް މެދުކަނޑާލިކަމަށް އޮތް ވާހަކައަކީ ރަނގަޅު ވާހަކައެއް ނޫން ކަމަށް އިމްރާނު ވިދާޅުވި އެވެ.

އެހެން ނަމަވެސް ބިލުތަކަށް ފައިސާ ނުދެއްކިގެން މައްސަލަތަކެއް ދިމާވެ ދަތިތަކެއް ދިމާވި ކަމަށް އިމްރާންވެސް އެއްބަސްވެލެއްވި އެވެ.

"އެހެން ނަމަވެސް އިއްޔެ ވަނީ ބިލުތަކަށް ފައިސާ ދެއްކިފައި. ދެން ބިލުތަކަށް ފައިސާ ދެއްކުމުގައި ހުރި ދަތިކަން އެއީ އަޅުގަނޑުމެންނަށް ކުރެވެން އޮންނަ ކަމަކީ ބިލުތައް ގެނެސް ބިލުތައް ޕޯސްޓުކުރުން ފައިސާ ދެއްކުމަށް. ދެން ފައިސާ ދެއްކުމުގައި ދިމާވާ ދަތިތައް ދެން އަޅުގަނޑު ހިތުން އަޅުގަނޑުމެން އެންމެނަށް އެބަ ފާހަގަ ކުރެވޭ." އިމްރާން ވިދާޅުވި އެވެ.