މުއިއްޒުގެ ވެރިކަމެއްގައި ޕޮލިސް ކޮމިޝަނަރު ކަމަށާއި، ޕީޖީކަމަށް އައްޔަނު ކުރާނީ ގޭންގު ލީޑަރެއް: އިމްރާން

އިދިކޮޅު ޕީޕީއެމް/ ޕީއެންސީގެ ވެރިކަމެއްގައި ޕޮލިސް ކޮމިޝަނަރު ކަމަށާއި، ޕީޖީކަމަށް އައްޔަނު ކުރާނީ ގޭންގު ލީޑަރެއް ކަމަށް އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

ރޭ އެމްޑީޕީ ކޯލިޝަނުން އައްޑޫގައި ބޭއްވި ކެންޕޭނު ޖަލްސާގަައި ވާހަކަދައްކަވަމުން އިމްރާން ވިދާޅުވީ، އެއީ ނުރައްކާތެރި ވާހަކައެއް ކަމަށާއި، އެ ވާހަކަ ދެއްކުމުން އޭނައާއި، އޭނާގެ އާއިލާ ނުރައްކަލަށް ހުށަހެޅޭނެ ކަން އެނގިވަޑައިގަންނަވާ ކަމަށެވެ.

އިތުރަށް އިމްރާން ވިދާޅުވީ އިދިކޮޅު ކެންޑިޑޭޓް ޑރ. މުހައްމަދު މުއިއްޒު ރަނިންމޭޓަކަށް ހުސައިން މުހައްމަދު ލަތީފް، ކަނޑައެޅީ މަޖުބޫރުވެގެން ކަމަށާއި، އެކަމުގެ ސަބަބު ސަލާމަތީ ހިދުމަތްތަކުގައި ތިއްބެވި ބޭފުޅުންނަށް ވެސް އެނގިވަޑައިގަންނަވާ ކަމަށެވެ.

އަދި އޭނާ ވަނީ މުއިއްޒުގެ ކެންޕޭނަށް ގޭންގުތަކުން ފަންޑު ކުރާ ކަމަށް ތުހުމަތު ކުރައްވާފަ އެވެ.

"މިއަދުގެ ހާލަތަކީ ކެމްޕޭނުގެ ފަންޑު ސީދާ ނުކުމެ ގޭންގުތަކުން ނުކުމެ ކުރާ ހިސާބަށް އެދަނީ، ޕީއެންސީގެ ކެންޑިޑޭޓް ކާމިޔާބު ކުރައްވައިފި ނަމަ، ނާއިބު ރައީސް އުޅުއްވާ ހިލާލީގެ ވާނީ ގޭންގުތައް އޮޕަރޭޓުކުރާ ކޮމާންޑް ސެންޓަރަކަށް" އިމްރާން ވިދާޅުވިއެވެ.