ކުޅުދުއްފުށީ އެއާޕޯޓަށް ފުރަތަމަ ފަހަރަށް މެނޭޖަރެއް

ކުޅުދުއްފުށީގައި ގާއިމުކޮށްފައިވާ އެއާޕޯޓަށް ފުރަތަމަ ފަހަރަށް މެނޭޖަރެއް ހަމަޖައްސައިފި އެވެ. އެއާޕޯޓް މެނޭޖަރަކަށް ހަމަޖެއްސީ ކުޅުދުއްފުށީ، ފަލަކު/ އާދަމް އަހުމަދެވެ.

ރީޖަނަލް އެއާޕޯޓްސް ކޮމްޕެނީގެ ދަށުން ހިންގާ މި އެއާޕޯޓަށް މެނޭޖަރެއް ހަމަޖައްސާފައިމިވަނީ މެނޭޖަރެއް ހޯދުމަށް އެ ކުންފުނިން އިއުލާނުކުރިތާ 6 މަހަށްވުރެ ގިނަ ދުވަސްވީ ފަހުންނެވެ.

މެނޭޖަރެއްގެ މަގާމަށް ހުޅުވާލުމުން ދެ ބޭފުޅަކު ކުރިމަތިލެއްވި އެވެ. މި މަގާމަށް ހަމަޖެއްސި އާދަމް އަހުމަދު ވަޒީފާއަށް ނުކުންނަވަން ފެއްޓެވީ މިދިޔަ ހަފުތާ ތެރޭގައި އެވެ. ހިންގުމުގެ ދާއިރާއިން މާސްޓާސް ހައްދަވާފައިވާ އާދަމް މީގެ ކުރިން ވަޒީފާއަދާކުރައްވާފައިވަނީ ޕްރައިވެޓް ސެކްޓަރގަ އެވެ.

ކުޅުދުއްފުށީ އެއާޕޯޓަށް ޝެޑިއުލް ފްލައިޓްތައް ފަށާފައިވަނީ 2019 ވަނަ އަހަރުގެ އޮގަސްޓްމަހު އެވެ. ރައީސް ޔާމީންގެ ވެރިކަމުގައި ހަދަން ފެށި މި އެއާޕޯޓް މިސަރުކާރުން ތަރައްގީނުކުރާތީ ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފަ އެވެ.