އިހަވަންދޫ މަގުތައް ތާރުއަޅައިގެން ހަދަން އާރުޑީސީއާ ހަވާލުކޮށްފި

ހއ އިހަވަންދޫ މަގުތަކުގައި ތާރުއެޅުމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ ހަވާލުކޮށްފި އެވެ. މި ޕްރޮޖެކްޓްގެ އަގަގީ 102،846،733.89 ރުފިޔާ އެެވެ.

540 ދުވަސްތެރޭގައި ނިންމަން ހަވާލުކުރި މި މަސައްކަތް އާރުޑީސީއާ ހަވާލުކުރީ ޑިޒައިން އެންޑް ބިލްޑް އުސޫލުންނެވެ. މި މަޝްރޫއުގެ ދަށުން އެރަށުގެ 6.9 ކިލޯ މީޓަރުގެ މަގުގައި ތާރުއަޅާނެ އެވެ.

އަދި މަގުތަކުގައި ފެންހިންދާ ނިޒާމު ގާއިމުކުރުމާއި މަގުތަކުގައި މަގުބައްތި ޖެހުންވެސް ހިމެނެ އެވެ. މި މަޝްރޫއުގެ ދަށުން އެރަށުގެ 15 މަގެއް ހަދާނެ އެވެ.

މި މަސައްކަތުގެ އެއްބަސްވުމުގައި ޕްލޭނިންގ މިނިސްޓްރީގެ ފަރާތުން ސޮއިކުރެއްވީ ޑިރެކްޓަރު ޖެނެރަލް ފާތިމަތު ޝާނާ ފާރޫގެވެ. އާރުޑީސީގެ ފަރާތުން ސޮއިކުރެއްވީ ޗީފް ފައިނޭންޝަން އޮފިސަރ ޔާސިރު ހަސަނެވެ.