އިޚްލާޞް ޤުރްއާން ކުލާހުގެ މަދަޙަ މުބާރާތުގެ ފަނޑިޔާރުންގެ ގޮތުގައި ޝަލަބީ އާއި ރާފިޢަތު

އިޚްލާޞް ޤުރްްއާން ކުލާހުގެ ފަރާތުން ކުޅުދުއްފުށީގެ މުއައްސަސާތަކަށާއި އިޚްލާޞް ޤުރްއާން ކުލާހުގެ ދަރިިވަރުންނާއި ބެލެނިވެރިންނަށް ހުޅުވާލައިގެން، އިޚްލާޞް މަދަޙަ މުބާރާތް 2023ގެ ނަމުގައި ބާއްވާ މަދަހަ ކިޔުމުގެ މުބާރާތް މިމަހު 26 ގައި ފަށާގޮތަށް ހަމަޖައްސައިފި އެވެ.

މި މުބާރާތް އިންތިޒާމުކުރާ އިޚްލާޞް ޤުރްއާން ކުލާހުގެ ހެޑްމާސްޓަރ މޫސާ މާހިރު ވިދާޅުވީ، މިހާރު މުބާރާތަށް ވާން ޖެހޭ އެންމެ ފަހުގެ ތައްޔާރީތައްވަމުންދާ ކަމަށެވެ. މި މުބާރާތް އޮންނާނީ މިމަހު 26 އިން 27 އަށް އަފީފުއްދީން ސްކޫލު ހޯލުގައެވެ.

މުބާރާތުގެ ފަނޑިޔާރުންގެ ގޮތުގައި ރާއްޖޭގެ މިޔުޒިކީ ދާޢިރާގައި މަސައްކަތް ކުރާ މަޝްހޫރޫ ފަންނާނުން ބައިވެރިވާނެއެވެ. އެގޮތުން މުބާރާތުގައި ޖަޖުންގެ ގޮތުގައި ބައިވެރިވަނީ، ޝަލަބީ އިބްރާހީމާއި ރާފިޢަތު ރަމީޒާ އާއި އިބްރާހީމް އާމިރު އަދި ޢިއްޒަ އަޙްމަދު ނިޒާރެވެ.

މާހިރު ވިދާޅުވީ، މުބާރާތުގައި 12 މުއައްސަސާއަކުން ބައިވެރިވެފައިވާއިރު، ގުރޫޕު މަދަޙައާއެކު 200 އަށްވުރެ ގިނަ މީހުން މަދަހަ ހުށަހަޅާނެ ކަމަށެވެ. މުބާރާތް ބަލައިލަން ބޭނުންވާ ކޮންމެ ފަރާތަކަށް ވެސް ހުޅުވާލައިގެން ކުރިއަށްގެންދާ މި މުބާރާތުގެ ފެށުމުގެ ރަސްމިއްޔާތު އޮންނާނީ، 2023 މެއި 26 ވާ ހުކުރު ދުވަހުގެ 14:00 ގައެވެ. މި ރަސްމިއްޔާތުގައި ޝަލަބީއާއި ރާފިޢަތުގެ ހުށަހެޅުންތައް ވެސް އޮންނާނެ ކަމަށް މާހިރު ވިދާޅުވިއެވެ.

މިއީ މިހާ ބޮޑުކޮށް މަދަޙަ މުބާރާތެއް ކުޅުދުއްފުށީގައި ކުރިއަށްގެންދާ ފުރަތަމަ ފަހަރެވެ. މިއީ އިޚްލާޞް ޤުރްއާން ކުލާހުން ބާއްވާ 3 ވަނަ މަދަޙަ މުބާރާތެވެ.