ކުޅުދުއްފުށީ އެއާޕޯޓަށް ރޭގަނޑު ދަތުރުތައް ނުފަށަ މަޑުޖައްސާލަން އަންގައިފި

މޯލްޑިވިއަނުން ކުޅުދުއްފުށީ އެއާޕޯޓަށް ރޭގަނޑު ދަތުރުތައް ފަށަން އިއުލާނުކޮށްފައިވަނިކޮށް، ރޭގަނޑު ދަތުރުތައް ނުފަށަ މަޑުޖައްސާލަން މޯލްޑިވިއަނަށް ރީޖަނަލް އެއާޕޯޓްސް އިން އަންގައިފި އެވެ.

ކުޅުދުއްފުށީ އެއާޕޯޓަށް ރޭގަނޑު ފްލައިޓް ދަތުރުތައް ކުރެވޭނެ ގޮތަށް ރަންވޭގައި ބައްތި ޖަހާ ނިންމާ ޓެސްޓް ފްލައިޓް އެޅީ މިމަހު 13 ވަނަ ދުވަހު އެވެ. އަދި މިމަހު 30 ގައި ރޭގަނޑު ފްލައިޓްތައް އަޅަން ފަށާނެކަމަށް މޯލްޑިވިއަނުން އާންމުކޮށް މިއަދު ބުކިންއަށް ހުޅުވާލާނެކަން އޮތީ އިއުލާނުވެސްކޮށްފަ އެވެ.

އެހެންނަމަވެސް ކުޅުދުއްފުށީ އެއާޕޯޓަށް ރޭގަނޑު ދަތުރުތައް ނުފަށަ މަޑުޖައްސާލަން ރީޖަނަލް އެއާޕޯޓްސް އިން މޯލްޑިވިއަން އަންގާފައިވާކަން މިނޫހަށް މޯލްޑިވިއަނުން ވަނީ ކަށަވަރުކޮށްދީފަ އެވެ.

މޯލްޑިވިއަންގެ ޕަބްލިކް ރިލޭޝަން އެގްޒެކެޓިވް މުޝިއިލް ސޮބާހް ވިދާޅުވީ، ކުޅުދުއްފުއްޓަށް ރޭގަނޑު ޕްލައިޓްތައް ނާޅަ މިވަގުތަށް މަޑުޖައްސާލަން ރީޖަނަލް އެއާޕޯޓްސް އިން އަންގާފައިވާ ކަމަށެވެ. އެކަމުގެ އިތުރު ތަފްސީލެއް ނުދެއްވަ އެވެ.

އެކަމާ ގުޅިގެން ރީޖަނަލް އެއާޕޯޓްސްގެ ބަހެއް އަދި ވަނީ ލިބޭ ގޮތް ނުވެ އެވެ.

މިމަހު ތިންވަނަ ދުވަހު ކޭއޯއަށް ދެއްވި އިންޓަވިއުއެއްގައި ރީޖަނަލް އެއާޕޯޓްސް ކޮމްޕެނީ ލިމިޓެޑް(އާރުއޭސީއެލް)ގެ މެނޭޖިން ޑިރެކްޓަރު މުހައްމަދު ރިޒުވީ ވިދާޅުވެފައިވަނީ، ކުޅުދުއްފުށީ ރަންވޭގައި ލައިޓް ޖަހާ ނިންމާ، ރޭގަނޑު ފްލައިޓް އޮޕަރޭޓްކުރަން ރަންވޭ ތައްޔާރުވެފައިވާ ކަމަށާއި މިއަދު ނައިޓް ލޭޑިންގއަށް ހުޅުވާލެވޭނެ ކަމަށެވެ.