ސަރުކާރުން ކުޅުދުއްފުއްޓަށް 20 އަށްވުރެގިނަ ވައުދުވި، 3 ވައުދުވެސް ނިންމާނުލެވުނު: މުހައްމަދު

ކުޅުދުއްފުށީގެ ތަރައްގީއަށް މިސަރުކާރުން 20 އަށްވުރެ ގިނަ ވައުދުވެފައިވާއިރު އޭގެ ތެރެއިން އެންމެ 3 ވައުދުވެސް ފުއްދައިދެވިފައިނުވާކަމަށް ސިޓީ ކައުންސިލް މެމްބަރު މުހައްމަދު ދާއޫދު (ފޯއްޅެ) ވިދާޅުވެއްޖެ އެވެ.

ސިޓީ ކައުންސިލްގައި މިއަދު އޮތް އާންމު ބައްދަލުވުމުގައި ވާހަކަދައްކަވަމުން މުހައްމަދު ވިދާޅުވީ، ކުޅުދުއްފުށީގެ ރައްޔިތުންގެ ބޮޑު އަގުލަބިއްޔަތަކުން އެމްޑީޕީގެ ސަރުކާރެއް ގެނެސް، ސަރުކާރަށް ނިސްބަތްވާ ދެ މެމްބަރުން މަޖިލީހަށް އިންތިހާބުކޮށް، ސިޓީ ކައުންސިލްގެ ހުރިހާ ގޮނޑިއެއް އެމްޑީޕީއަށް ރައްޔިތުން ދިނީ ވަރަށް ބޮޑު އުންމީދަކާއެކު ކަމަށެވެ.

"އެހެންނަމަވެސް ސަރުކާރުން އަޅުގަނޑުމެންނަށް އެންމެ އެދެވޭ ގޮތަކަށް އަޅައެއް ނުލި. ކުޅުދުއްފުށި ވަރަށް ބޮޑަށް ބާކީކޮށްލިތަން މި ފެނުނީ ސަރުކާރުން." އުތުރު ދާއިރާގެ ކައުންސިލަރު ވިދާޅުވި އެވެ.

އޭނާ ވިދާޅުވީ، ރިޔާސީ އިންތިހާބަށް ކައިރީވީމަ އަނެއްކާވެސް ސަރުކާރުގެ ބޭފުޅުން ރަށަށް ވަޑައިގެން ހޮޅި ވައުދުތަކެއްވެ ރައްޔިތުން ގުނބޯ ހައްދައިގެން ވޯޓް ލިބޭނެކަމަށް ގަބޫލުކުރުމަކީ މޮޔަ ހިޔާލެއް ކަމަށެވެ.

ފާއިތުވެދިޔަ މާޒީގައި ފަސްވެރިކަމެއް ފެނިގެންގޮސްފައިވާކަން ފާހަގަކުރައްވަމުން މުހައްމަދު ވިދާޅުވީ، 2008 ވަނަ އަހަރު އިންތިހާބުވި އެމްޑީޕީގެ ވެރިކަމުގައި ރައްޔިތުންނާ ގުޅުން ހުރި މުހިންމު ހިދުމަތްތަކެއް ފޯރުކޮށްދިން ކަމަށެވެ.

އަދި އެ ވެރިކަމަކީ ރައްޔިތުންނާ ގާތުން ވަކިން ހާއްސަ ގޮތެއްގައި ކުޅުދުއްފުއްޓަށް ގިނަ ކަންތައްތަކެއް ކޮށްދެއްވި ސަރުކާރެއްކަން މުހައްމަދު ފާހަގަކުރެއްވި އެވެ. އެގޮތުން ނަރުދަމާ ނިޒާމާއި ފެނުގެ ނިޒާމާއި ފަޅު ހިއްކުމާއި ހައުސިންގ މަޝްރޫއުތައްފަދަ ގިނަ ކަންތައްތަކެއް ފާހަގަކުރެއްވި އެވެ.