ހިރަފުހާއި ނައިވާދޫ ޓްރެއިނާސް ކުލަބް ބައްދަލުކުރި މެޗަށް ހަމަހަމަ ނިމުމެއް

ކުޅުދުއްފުށި ސިޓީ ކައުންސިލުން އިންތިޒާމުކޮށްގެން ކުރިއަށްގެންދާ ކުޅުދުއްފުށި ޗެމްޕިއަންޝިޕް 2023 ގައި މިއަދު ކުޅެވުނު މެޗުގައި ހިރަފުސް ސްޕޯޓްސް ކުލަބާއި ނައިވާދޫ ޓްރެއިނާސް ސްޕޯޓްސް ކުލަބް ބައްދަލުކޮށް ދެ ޓީމު އެއްވަރުވެއްޖެ އެވެ.

މިއަދު ހަވީރު ކުޅެވުނު މެޗުގައި ހިރަފުހާއި ނައިވާދޫ ބައްދަލުކުރި މެޗު ނިމުނީ 1 - 1 ން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހާ ލީޑު ނެގީ ހިރަފުހުންނެވެ. މިލަނޑު އެޓީމަށް ޖަހައިދިނީ އެޓީމުގެ ޖޯޒީ ނަމްބަރު 7 ހުސެއިން ޝަރީފް އެވެ. ފުރަތަމަ ހާފު ނިމުނީ 1 - 0 ން ހިރަފުސް ކުރީގައި އޮވެގެންނެވެ.

ދެވަނަ ހާފުގައި ވެސް ފޯރިގަދަ ކުޅުމެއް ފެނިގެންދިޔައިރު ނައިވާދޫއިން ވަނީ ކުޅުން ރަނގަޅުކޮށް ދެވަނަ ހާފުގެ ކުރީކޮޅު ލަނޑެއް ޖަހާ ނަތީޖާ އެއްވަރުކޮށްފަ އެވެ. މިލަނޑު އެޓީމަށް ޖަހައިދިނީ އެޓީމުގެ ޖޯޒީ ނަމްބަރު 59 މުހައްމަދު ރިޝާން އެވެ. މިމެޗުގައި ރިޝާންގެ ފަރާތުން މޮޅު ކުޅުމެއް ފެނިގެންދިޔައިރު އޭނާ ވަނީ މެޗުގެ މޮޅު ކުޅުންތެރިޔާގެ މަގާމުވެސް ހާސިލްކޮށްފަ އެވެ.

މުބާރާތުގައި މާދަމާ ކުޅެވޭ މެޗުގައި ބައްދަލުކުރާނީ ޒިގްޒެގާއި މާއްޓޭ ސްޕޯޓްސް ކުލަބެވެ. މިމެޗު ކުރިއަށްދާނީ ކުޅުދުއްފުށީ ޒޯން ސްޓޭޑިއަމްގައި މާދަމާ ހަވީރު 4 ޖަހާއިރު އެވެ. މިމެޗު ސިޓީ ކައުންސިލުގެ ފޭސްބުކް ޕޭޖުން ލައިވްކުރާނެ އެވެ.