ފަރިރީތި ފިހާރަ ގޮއްވާލާނެ ކަމަށް ބުނި މީހަކު ހަ މަސް ދުވަހަށް ޖަލަށްލުމަށް ހުކުމްކޮށްފި

ކުޅުދުއްފުށި ފަރި ރީތި ފިހާރަ ގޮއްވާލާނެ ކަމަށް ބުނެ އިންޒާރުދިން މީހަކު 6 މަސް ދުވަހަށް ޖަލަށް ލުމަށް އިއްޔެ ކްރިމިނަލް ކޯޓުން ހުކުމް ކޮށްފިއެވެ.

ކްރިމިނަލް ކޯޓުން މި ހުކުމް ކޮށްފައިވަނީ ކުޅުދުއްފުށި، ކަނޑޫމާގެ، އިބްރާހިމް ހަސަންގެ މައްޗަށެވެ. ދައުލަތުން އޭނާގެ މައްޗަށް އުފުލީ ބިރު ދެއްކުމުގެ ކުށުގެ ދައުވާ އެވެ.

ދައުވާގައިވާ ގޮތުން ކުޅުދުއްފުށި ފަރިރީތި ފިހާރައިގެ ވެރިޔާއަށް، އިބްރާހީމް ހަސަން ބިރުދެއްކީ މިއަހަރުގެ ފެބްރުއަރީ ހަތަރުވަނަ ދުވަހު އެވެ. އެ ހާދިސާއާ ގުޅިގެން އިބްރާހިމް ހަސަންގެ މައްޗަށް އުފުލި ބިރުދެއްކުމުގެ ދައުވާއަށް އޭނާ ވަނީ ތަހުގީގު މަރުހަލާގެ އިތުރުން ކޯޓުގައި ވެސް އިއުތިރާފުވެފައެވެ.

އިބްރާހީމް ހަސަން ކުރި ކުށުގެ އަސާސީ އަދަބަކީ ހަ މަހާއި 18 ދުވަހެވެ. އެކަމަކު އޭނާ ކުށަށް އިއުތިރާފްވެފައިވާތީ އަދި އޭނާ އިންޒާރު ދިން ނަމަވެސް އޭނާގެ ފަރާތުން މީހަކަށް އަނިޔާއެއް ލިބިފައި ނުވާތީ ފަނޑިޔާރު ވަނީ އިބްރާހީމް ހަސަންގެ ކުށުގެ އަދަބު ހަމަސް ދުވަހަށް ކުޑަކޮށްފަ އެވެ.

މިހުކުމާ ގުޅިގެން އޭނާ ޖަލުގައި ތަންފީޒުކުރާނީ ފަސް މަހާއި 22 ދުވަހެވެ. އެއީ އޭނާ އިންޒާރު ދިނުމާ ގުޅިގެން ތަހުގީގުގެ ބޭނުމަށް ބަންދުގައި ބެހެއްޓި އަށް ދުވަސް ކެނޑުމަށްފަހު އެވެ.