އުރީދޫ މަސް ރޭހުގައި ބައިވެރިވުމުގެ މުއްދަތު އިތުރުކޮށްފި

ރާއްޖޭގެ ހަތަރު ސިޓީ ހިމެނޭހެން ބޭއްވޭ އެންމެ ބޮޑު މަސް ބޭނުމުގެ މުބާރާތް، އުރީދޫ މަސްރޭސް 2023 ބައިވެރިވުމުގެ ފަހުގެ ފުރުސަތު އުރީދޫ މޯލްޑިވްސްއިން ދީފިއެވެ. އުރީދޫން ބުނީ ކޮންމެ އަހަރަކު ބާއްވަމުން އަންނަ މަސްވެރިކަމުގެ މުބާރާތް އުރީދޫ މަސްރޭސް 2023 ގައި ބައިވެރިވުމުގެ ފަހުގެ ފުރުސަތެއްގެ ގޮތުން މި މަހުގެ އަށްވަނަ ދުވަހުގެ ނިޔަލަށް އިތުރުކޮށްފައިވާ ކަމަށެވެ.

އުރީދޫ މޯލްޑިވްސްގެ 18 ވަނަ އަހަރީ ދުވަސް ފާހަގަކުރުމުގެ ގޮތުން މި އަހަރުގެ މަސްރޭސް އޯގަސްޓް މަހު ބޭއްވުމަށް ހަމަޖެހިފައިވާއިރު މި މުބާރާތް ވެގެން ދާނީ ރާއްޖޭގައި ބޭއްވޭ އެންމެ ބޮޑު އަދި އެންމެ ކުލަ ގަދަ މަސްވެރިކަމުގެ މުބާރަތަށް ކަމަށް އެ ކުންފުނިން ބުނެއެވެ.

އުރީދޫ އިން ބުނީ އެހެން އަހަރުތަކާ ހިލާފަށް މި އަހަރުގެ މަސްރޭސް މާލެ، ކުޅުދުއްފުށި، ފުވައްމުލައް އަދި އައްޑޫ ސިޓީގައި ކުރިއަށް ގެންދާނެ ކަމަށެވެ.

ރާއްޖޭގެ ހަތަރު ސިޓީގައި ތިބި ޝައުގުވެރިވާ ފަރާތްތަކުން އުރީދޯ މަސް ރޭސް ޕޯޓަލް މެދުވެރިކޮށް ޓީމުތައް ރަޖިސްޓްރީ ކުރަންވެސް އުރީދޫ އިން ވަނީ ހަނދާންކޮށްދީފަ އެވެ.

އުރީދޫ އިން ބުނީ ރަޖިސްޓްރޭޝަން ފޯމް ހުށަހަޅާއިރު ޓީމުގެ ކޮންމެ ބައިވެރިއަކަށް 150 ރުފިޔާއަށް މަސްރޭސް ކިޓް މޫލީ މެދުވެރިކޮށް ގަނެވޭނެ ކަމަށެވެ.

މަސްރޭސް ކިޓުގައި ހިމެނެނީ މަސްރޭސް ކޯރި އާއި ޓީޝާޓެވެ. ކޮންމެ ޓީމެއްގައި ކެޕްޓަނާއި އޮފިޝަލުން ހިމެނޭ ގޮތަށް 12 މެމްބަރުން ތިބެންޖެހެ އެވެ.

މި މުބާރާތުގައި ޖުމްލަ 160،000 ރުފިޔާގެ އިނާމު ދިނުމަށް ހަމަޖެހިފައިވެ އެެވެ. މީގެތެރެއިން ކޮންމެ ސިޓީއަކުން ތިރީގައިވާ ގޮތަށް ފައިސާގެ އިނާމު ލިބިގެންދާނެ އެވެ.

އުރީދޫ މޯލްޑިވްސްގެ މަސް ރޭސް މާލޭގައި ފަށާނީ އޮގަސްޓް ހަތަރުވަނަ ދުވަހު އެވެ. ކުޅުދުއްފުށީގައި އޮގަސްޓް 11 ވަނަ ދުވަހު ފެށުމަށް ހަމަޖެހިފައިވާއިރު ފުވައްމުލަކުގައި ފެށުމަށް ހަމަޖެހިފައިވަނީ އޮގަސްޓް 25 ވަނަ ދުވަހު އެވެ. އަދި އައްޑޫގައި ފެށުމަށް ހަމަޖެހިފައިވަނީ އޮގަސްޓް 18 ވަނަ ދުވަހު އެވެ.