ށ އަތޮޅަށް ރައީސް ވެވަޑައިގެންނެވި ވައުދުތައް ރަނުން ރަނަށް ފުއްދަވައިފި: ރާޝިދު

ށ އަތޮޅުގެ ތަރައްގީއަށް ރައީސް އިބުރާހިމް މުހައްމަދު ސޯލިހް ވެވަޑައިގަންނަވާފައިވާ ވައުދުތައް ރަނުން ރަނަށް ފުއްދަވައިދެއްވައިފިކަމަށް ކޮމަންޑޫ ދާއިރާގެ މަޖިސް މެމްބަރު މުހައްމަދު ރާޝިދު ވިދާޅުވެއްޖެ އެވެ.

ރިޔާސީ އިންތިހާބުގެ ކެމްޕެއިންނަށް ރައީސް އިބުރާހިމް މުހައްމަދު ސޯލިހް އެއަތޮޅުގައި އުޅުއްވާއިރު މިއަދު އެއަތޮޅުގެ ފަހު މަންޒިލެއްގެ ގޮތުގައި ވަޑައިގެންނެވީ ކަނޑިތީމަށެވެ. ދެން ވަޑައިގަންނަވާނީ ހދ ހަނިމާދުއަށެވެ. އެއަށްފަހު ހއ އަތޮޅުގެ ބައެއް ރަށްތަކަށް ރައީސް ވަޑައިގަންނަވާނެ އެވެ.

ރާޝިދު ދެންމެ ކުރެއްވި ޕޯސްޓެއްގައި ވިދާޅުވީ ށ އަތޮޅުގެ 14 ރަށުގެ ކެމްޕެއިން ރައީސް ނިންމަވާލަދެއްވީ 2023 ގެ އެތައް ވައުދުތަކާއެކު ކަމަށެވެ. އަދި އެ ވައުދުތައް ފުއްދުމަށްޓަކާ ރައީސްއަށް އިންތިހާބު ކާމިޔާބުކުރުމަށް ށ އަތޮޅޫ އޮތީ ވަރަށް ބޮޑަށް ތައްޔާރުވެފަ ކަމަށެވެ.

އެހެން ޕޯސްޓެއްގައި ރާޝިދު ލިޔުއްވާފައިވަނީ ށ އަތޮޅުން ރައީސް އިބުރާހިމް މުހައްމަދު ސޯލިހަށް 70 އިންސަތަ ވޯޓް ލިބޭނެ ކަމަށެވެ.

" ރައީސް އިބޫ [ އިބުރާހިމް މުހައްމަދު ސޯލިހް ] އަކީ ށ އަތޮޅު ބަދަލުކޮށްލަދެއްވި ށ ރަސްގެފާނު. ށ އަތޮޅުގެ ހަތަރު އެމްޕީ މިތިބީ ފިސާރި ގަދަކޮށް މިކަން ނިންމަން." މެމްބަރު ރާޑޯ ވިދާޅުވި އެވެ.