ރައީސް ސޯލިހުގެ ރަނިން މޭޓަކަށް އައްޑޫ އަސްލަމް

އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ރަނިން މޭޓަކަށް ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ހަމަޖައްސަައިފިއެވެ. އެމްޑީޕީގެ ތަރުޖަމާނު، އަނަސް އަބްދުއްސައްތާރު ވަނީ މިއަދު އެކަން އިއުލާނުކުރައްވާފައެވެ.

އަސްލަމް، ރަނިންމޭޓަކަށް ކަނޑައަޅަން ނިންމެވުމުން އޭނާ މިހާރު ވަނީ ކުށުގެ ރެކޯޑު ސާފު ކުރުމަށް ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އަށް ހުށަހަޅުއްވައިފައެވެ.

ކުރިއަށް އޮތް ރިޔާސީ އިންތިހާބުގައި އެމްޑީޕީގެ ރިޔާސީ ކެންޑިޑޭޓް ރައީސް @ibusolih ގެ ރަނިންގ މޭޓަކަށް އެމްޑީޕީގެ ޕީޖީ ލީޑަރ @aslamdp ހަމަޖައްސަވައިފި.

މި ފުރުސަތުގައި ޕީޖީ ލީޑަރ މުހައްމަދު އަސްލަމަށް ވަރަށް ހޫނު މަރުހަބާއެއް ދަންނަވަން.#UfaaveriAmaanRaajje

— Anas Abdul Sattar (@anasabdulsattar) August 5, 2023

އަސްލަމަކީ އެމްޑީޕީގެ ތިއްބެވި ސިޔާސީ ގޮތުން އެންމެ ތަޖުރިބާ ބޮޑު ބޭފުޅުންގެ ތެރޭގައިވެސް ހިމެނޭ ބޭފުޅެކެވެ.

ރިޔާސީ އިންތިހާބުގައި ވާދަކުރެއްވުމަށް މިހާތަނަށް ކެންޑިޑެސީ ފޯމު ހުށަހަޅުއްވާފައިވަނީ ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީން އެކަންޏެވެ. ނަމަވެސް އެމަނިކުފާނުގެ ކެންޑިޑެސީ މައްސަލަ އިލެކްޝަންސް ކޮމިޝަނުން ބަލައިގެންފައެއް ނުވެ އެވެ. އެމައްސަލަ ސުޕްރީމް ކޯޓުގައި އިސްތިއުނާފް ކުރުމުން އަޑުއެހުންތައް ބާއްވާ މިހާރު ވަނީ ހުކުމާ ހަމައަށް ގޮސްފަ އެވެ.

ރިޔާސީ އިންތިހާބުގައި ވާދަކުރުމަށް ޝައުގުވެރިވާ ބޭފުޅުންނަށް ފުރުސަތު ހުޅުވާލާފައިވަނީ އަންނަ ހޯމަ ދުވަހުގެ ނިޔަލަށެވެ.