ދެވަނަ ބުރެއްގައި ކޯލިޝަން ހެދުމަށް ޕާޓީތަކާ އެބަ މަޝްވަރާކުރަން: ރައީސް

ރިޔާސީ އިންތިހާބުގެ 2 ވަނަ ބުރުގައި ކޯލިޝަން ހެދުމަށް ޕީޕީއެމް ފިޔަވާ ދެން ހުރި ޕާޓީތަކާއެކު މަޝްވަރާ ކުރައްވަމުންދާކަމަށް އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ރިޔާސީ އިންތިހާބުގެ ކެމްޕޭނުގައި ލ. އަތޮޅަށް މިހާރު ކުރައްވަމުންދާ ދަތުރުފުޅުގެ ތެރެއިން ނޫސްވެރިންނާ ބައްދަލުކުރައްވާ ވާހަކަދައްކަވަމުން ރައީސް ވިދާޅުވީ، ރިޔާސީ އިންތިހާބުގައި ވާދަކުރައްވާ ބައެއް ކެންޑިޑޭޓުންނަށް ފުރަތަމަ ބުރުގައި ފުރުސަތު ނެތްކަން މިހާރު ސާފުވާ ކަމަށެވެ.

ދެވަނަ ބުރަކަށް ހިނގައްޖެނަމަ ޕީޕީއެމް ނޫން އެހެން ހުރިހާ ޕާޓީތަކާއެކު ކޯލިޝަން ހެދުމަށް މަޝްވަރާކުރަމުން އަންނަކަމަށް ރައީސް ސޯލިހް ވިދާޅުވިއެވެ. ރައީސް ވިދާޅުވީ ޕީޕީއެމްއާއި އެމްޑީޕީއަކީ ތަފާތު 2 ފިކުރެއްގެ ބައެއްކަމަށާއި ގައުމަށް ފައިދާވާނީ 2 ޕާޓީން ވަކިން މަސައްކަތް ކޮށްގެންކަމަށެވެ. އަދި ސިޔާސީ ވާދަވެރިކަންވެސް އޮންނާނީ ވަކިން މަސައްކަތްކޮށްގެންކަމަށް ވިދާޅުވިއެވެ. އެހެންކަމުން ދެވަނަ ބުރުގައި ކޯލިޝަން ހެދުމަށް އެހެން ޕާޓީތަކާއެކު އެކި ލެވެލްގައި މަޝްވަރާ ކުރަމުން އަންނަކަށާއި މި ދަނޑިވަޅަކީ ދެންތިބި ޕާޓީތަކުން ގޮތް ނިންމަންވީ ދަނޑިވަޅުކަމަށް އެމަނިކުފާނު ވިދާޅުވިއެވެ.

"ދެން ހުރި ޕާޓީތަކުގެ އެކި ލެވެލްގައި އަޅުގަނޑުމެންނާ ވާހަކަ އެބަ ދެކެވޭ. އަޅުގަނޑު ހިތުން މިހާރު އޭގެތެރެއިން ބައެއް ބޭފުޅުންނަށް ގަބޫލުފުޅު ކުރެއްވޭނެ އެ ބޭފުޅުންނަށް ފުރަތަމަ ބުރުގައި އުންމީދެއް ނެތްކަން" ރައީސް ވިދާޅުވިއެވެ.

މީގެ އިތުރުން ރައީސް ވަނީ އެމްޑީޕީން ވަކިވެ، ދަ ޑިމޮކްރެޓްސްއާ ގުޅުނު ރައްޔިތުންގެ މަޖިލީހުގެ މެންބަރުންނަށް އަނބުރާ ޕާޓީއަށް ވަޑައިގަތުމުގެ ދައުވަތު ދެއްވާފައެވެ.

"އަޅުގަނޑު މިހާރު ވެސް އެ ހުރިހާ ބޭފުޅުންނަށް، ދެން އަޅުގަނޑުމެންނާ މި ވަގުތު ތަންކޮޅެއް ދުރަށް ޖެހިވަޑައިގެންނެވި ބޭފުޅުންނަށް ވެސް މި ދައުވަތު އަރުވަނީ، އެމްޑީޕީ ތެރޭގައި އަބަދު ވެސް އެ ބޭފުޅުންނަށް އެޖާގަ އޮންނާނެ"، ރައީސް ވިދާޅުވި އެވެ.

ޑިމޮކްރެޓްސްގައި ތިއްބެވި މެންބަރުންގެ ތެރެއިން، ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފާއި، ތޮއްޑޫ ދާއިރާގެ މެންބަރު އަހްމަދު ޝިޔާން ވަނީ އަލުން އެމްޑީޕީއާ ގުޅިވަޑައިގެންފައެވެ. ރައީސް ވިދާޅުވީ އަދިވެސް ބައެއް މެންބަރުން އެމްޑީޕީއާ ގުޅުމުގެ މަޝްވަރާތައް ކުރިއަށްދާ ކަމަށެވެ.

ރައީސް ވިދާޅުވީ ޕާޓީން ބައެއް މެންބަރުން ވަކިވި ނަމަވެސް، ރަށްރަށުގައި އެމްޑީޕީ އޮތް ގޮތަށް އެބައޮތް ކަމަށެވެ. ވަކިވާ މެންބަރުން އަނބުރާ އަންނަނީ އާންމު ރައްޔިތުން އެމްޑީޕީއާއެކު ތިބުމުން ކަމަށް އެމަނިކުފާނު ވިދާޅުވިއެވެ.

"އަޅުގަނޑުމެން ހަމަ ގައިމު ވެސް އެއްވެސް މެންބަރަކަށް އެއްވެސް ކަހަލަ ފައިސާގެ މުއާމަލާތެއް ނުވަތަ ރިޝްވަތޭ ތި ވިދާޅުވާ ފުޅާ މާނައިގައި ހިމެނޭ ކަހަލަ އެއްވެސް ކަމެއް ކޮށްފައެއް ނޯންނާނެ" މެންބަރުން ޕާޓީ ބަދަލުކުރުމުގައި ރިޝްވަތުގެ މުއާމަލާތްތައް ހިމެނޭ ކަމަށް ކުރެވޭ ތުހުމަތުތަކަށް ރައްދު ދެއްވަމުން ރައީސް ވިދާޅުވިއެވެ.