މިލިޓަރީ މަސައްކަތެއްގައި ބޭރު ސިފައިން ނުތިބޭނެ: ރައީސް

މިލިޓަރީ މަސައްކަތެއް ކުރަން ބޭރުގެ އެއްވެސް ބަޔަކު ރާއްޖޭގައި ނެތް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެ އެވެ.

ސަންގު ޓީވީން އިންތިމާޒުކޮށްފައިވާ ރިޔާސީ ބަހުސްގައި ވާހަކަދައްކަވަމުން ރައީސް ސޯލިހު ރޭ ވިދާޅުވީ ރާއްޖެއިން ބޭރުގެ އެއްވެސް ގައުމެއްގެ ސިފައިން އަސްކަރީ މަސައްކަތް ކުރުމަށް ރާއްޖޭގައި ނުތިބޭނެ ކަމަށެވެ.

ބޭރުގެ ގައުމުތަކާއި އެކީގައި އޮންނަ އެއްބަސްވުމެއްގެ ދަށުން ތަމްރީންތައް ރާއްޖޭގައި ކުރިއަށްދާ ކަމަށާއި ބޭރު ގައުމުތަކުގެ ސިފައިން އެ ބޭނުމުގައި ރާއްޖެ އައި ކަމުގައިވިޔަސް ރާއްޖޭގައި އަސްކަރީ މަސައްކަތް ކުރުމަށް ބޭރު ސިފައިން ނެތް ކަމުގައި ވިދާޅުވި އެވެ.

"ބޭރުގެ އެއްވެސް ގައުމެއްގެ ސިފައިން މިލިޓަރީ މަސައްކަތެއް ކުރާކަށް ރާއްޖެއަކު މިހާރަކު ވެސް ނެތް. އިއްޔެއަކު ވެސް ނެތް. އަޅުގަނޑު ދެކޭ ގޮތުގައި އޭގެ ކުރިއަކު ވެސް ނެތް. އެހެނެއް ނޫން ދޭދޭ ގައުުމުތަކާ އެކީގައި އޮންނަ އެއްބަސްވުންތަކުގެ ދަށުން ޓްރޭނިންތައް ހެދުމަށް އެކިއެކި އެކްސަސައިޒް ހިންގުމަށް އިންޑިއާ މީހުން ވެސް އާދޭ މިތަނަށް، ލަންކާ މީހުން ވެސް އާދޭ، އެމެރިކާ މީހުންވެސް އާދޭ، އިނގިރޭސިން ވެސް އާދޭ ބައެއް ފަހަރު،" ރައީސް ސޯލިހު ވިދާޅުވި އެވެ.

އެމަނިކުފާނު ވިދާޅުވި ގޮތުގައި ތަމްރީނުތައް ކުރިއަށް ގެންދަން ރާއްޖެއަށް އަންނަނީ ހަމަ އެކަނި އިންޑިއާ ސިފައިންނެއް ނޫނެވެ. އެމެރިކާ ސިފައިންނާއި ޗައިނާ ސިފައިން ވެސް އެގޮތަށް އަންނަ ކަމަށް އެމަނިކުފާނު ވިދާޅުވި އެވެ.

މިހެންވުމާއެކު ޓްރެއިނިންތަކަށް ބޭރު ސިފައިން ރާއްޖެ އައުމަކީ މައްސަލައެއްގެ ގޮތުގައި އެމަނިކުފާނު ދެކެވަޑައިނުގަންނަވާ ކަމުގައިވެސް ރައީސް ވިދާޅުވި އެވެ.

ރައީސް ވިދާޅުވީ އުތުރު ތިލަފަޅަކީ ރާއްޖޭގެ މިލްކެއް ކަމަށާއި އިންޑިއާއިން އެތަން ތަރައްގީކުރަނީ ހިލޭ ކޮށްދޭ ކަމެއްގެ ގޮތުގައި ކަމަށެވެ.

ރައީސް އިތުރަށް ވިދާޅުވީ އުތުރު ތިލަފަޅުގެ އެގްރިމެންޓުގައި މައްސަލައެއް އޮތް ނަމަ އެކަން އެނގޭ ފަރާތަކުން އެ މައުލޫމާތެއް ހާމަކުރައްވަން ޖެހޭނެ ކަމަށެވެ. އެހެންނަމަވެސް މައްސަލައެއް ހާމަކޮށްފައި ނުވާ ކަމަށާއި އެއިން އެއްވެސް އެގްރިމެންޓެއްގައި ރާއްޖޭގެ ސަލާމަތަށް ނުރައްކާވާފަދަ އެއްވެސް ކަމެއް ނޯންނާނެ ކަމުގެ ޔަގީންކަންވެސް ދެއްވި އެވެ.

ރާއްޖެއަކީ މިނިވަން ގައުމެއް ކަމަށާއި އެގޮތުގައި ދެމިއޮންނާނެ ކަމަށް ވިދާޅުވެ އަންނަ ފާޑުކިޔުންތަކަށްވެސް ރައީސް ވަނީ ރައްދުދެއްވާފަ އެވެ.