ރައްޔިތުންގެ މަޖިލީހުގެ ނައިބް ރައީސް އީވާ އަބްދުﷲ ސަލާމް ފޮނުއްވުމާއި ގުޅިގެން، މިއަދު އެޖެންޑާގައި އޮތް ރައްޔިތުންގެ މަޖިލީހުގެ ރަައީސް މުހައްމަދު ނަޝީދު ވަކި ކުރުމުގެ ޖަލްސާ ނުބޭއްވޭނެކަން އަންގައިފިއެވެ.
މަޖިލީހުގެ ގަވާއިދު ބުނާގޮތުން މަޖިލީހުގެ ރައީސްގެ އިތުބާރުގެ މައްސަލަ ކުރިއަށް ދާއިރު މަޖިލީހުގެ ރިޔާސަތުގައި އިންނަވަންވާނީ މަޖިލީހުގެ ނައިބު ރައީސެވެ. މަޖިލީހުގެ ނައިބު ރައީސް ނެތް ހާލަތެއްގައި ދެން އަމަލު ކުރާނެ ގޮތެއް މަޖިލީހުގެ ގަވާއިދަކު ލިޔެފައެއް ނުވެއެވެ.
ނަމަވެސް، މަޖިލީހުގެ ގަވާއިދުގައި ވަނީ އޭގެ ތެރެއިން ގަވާއިދެއްގައި ނެތް ކަމެއް ދިމާވެއްޖެނަމަ ދެން އަމަލު ކުރާނީ ރިޔާސީ ނިޒާމް އޮންނަ ގައުމުތަކުގައި އަމަލު ކުރާ އުސޫލަކުން ކަމަށް ބުނެފައެވެ.
މިއަދުގެ ޖަލްސާ ކެންސަލްކުރިކަން އިއުލާނުކުރައްވަމުން އަމީން އާއްމު ފާތިމަތު ނިއުޝާ ވިދާޅުވީ އީވާ އާލާސްކަންފުޅާ އުޅުއްވާކަން މަޖިލީހުގެ އިދާރާއަށް ލިއުމުން އެންގެވީ މިއަދު ހެނދުނު ކަމަށެވެ. އޭނާ ވިދާޅުވީ މަޖިލީހުގެ ރައީސް ވަކިކުރަން ހުށަހަޅާ ގަރާރެއްގެ ނޯޓިސް މެމްބަރުންނަށް ފޮނުވުމަށް ފަހު އެ ނޯޓިހުގެ މުއްދަތު ހަމަވެފައިިވާ ނަމަ އެންމެ ފުރަތަމަ އަށް އަންނަ ރަސްމީ ދުވަހު އެ ޖަލްސާ ބާއްވަން ޖެހޭ ކަމަށާއި އެހެންވީމާ މާދަމާގެ ޖަލްސާއަށް ވެސް އެޖެންޑާ ކުރާނީ އެ މައްސަލަ ކަމަށެވެ.
"މާދަމާގެ މަޖިލީހުގެ ޖަލްސާއަށް ވެސް މި ގަރާރު އަލުން އެޖެންޑާކޮށް، އެ ޖަލްސާގެ ރިޔާސަތު ބެލެހެއްޓެވުމަށް މަޖިލީހުގެ ނައިބުރައީސަށް ދަންނަވާނެކަން އިއްޒަތްތެރި މެމްބަރުންނަށް ދަންނަވަން،" މިއަދުގެ ޖަލްސާ ފަށަން އޮތް ގަޑިއަށް ތަޅުމަށް ވަޑައިގެން ތިއްބެވި މެމްބަރުންނާ މުހާތަބު ކުރައްވައި ނިއުޝާ ވިދާޅުވި އެވެ.
ނިއުޝާއަށް އީވާ ފޮނުއްވި ސިޓީގައި ވިދާޅުވެފައި އޮތީ މަޖިލީހުގެ ގަވައިދުގެ 246 ވަނަ މާއްދާގެ ދަށުން ސަލާމް ފޮނުއްވާ ކަމަށެވެ. މެޑިކަލް ސެޓްފިކެޓާއި ބްލަޑް ރިޕޯޓްތަކާ އެކު ފޮނުއްވި ސިޓީގައި އޭނާ އެދިވަޑައިގެންފައި އޮތީ އެ ލިޔުންތައް މަޖިލީގެ މެޖޯރިޓީ ލީޑަރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމާއި މައިނޯރިޓީ ލީޑަރު މެދު ހެންވޭރު ދާއިރާގެ މެމްބަރު އަލީ އާޒިމާ ހިއްސާކޮށްދެއްވުމަށެވެ.
އެންމެ ފުރަތަމަ އެމްޑީޕީން ނަޝީދު ވަކިވުމާ އެކު އެ މަނިކުފާނާއި އީވާގެ އިތުބާރު ނެތް ކަމުގެ މައްސަލައެއް އެމްޑީޕީން ހުށަހެޅިއެވެ. އެކަމަކު، އެ ފަހަރު ދެ މައްސަލަ އެއްފަހަރައި ހުށަހެޅުމުން މުޅި މަޖިލީސް ހުއްޓުނީއެވެ. އެހެންވެ، ނިމިދިޔަ ރިޔާސީ އިންތިޚާބުގެ ކެމްޕޭން ތެރޭ ނަޝީދުގެ ސަޕޯޓަރުންގެ ރުހުން ހޯދަން އެމްޑީޕީން ވަނީ އެ މައްސަލަ އަނބުރާ ގެނެސްފައެވެ.
އެކަމަކު، ދެވަނަ ބުރުގައި ވެސް ނަޝީދުގެ ދަ ޑިމޮކްރެޓްސްއިން އެމްޑީޕީއަށް ތާއީދު ނުކުރުމުން، އަނެއްކާ ވެސް އެމްޑީޕީން ވަނީ އިތުބާރު ނެތް ކަމުގެ މައްސަލަ މަޖިލީހަށް ވައްދައިފައެވެ.
މަޖިލީހުގައި މިހާރު އެމްޑީޕީގެ 56 މެންބަރުން ތިއްބަވައެވެ. މަޖިލީހުގެ ރައީސްގެ އިތުބާރު ނެތް ކަމުގެ މައްސަލައެއް ފާސްކުރަން ބޭނުންވަނީ 43 މެންބަރުންގެ ވޯޓެވެ.
އެންމެ ފަހުގެ އިތުބާރުގެ މައްސަލަ ހުށަހަޅާފައި ވަނީ 49 މެންބަރުގެ ސޮޔާއެކުގައެވެ.
