މަޖިލީހުގައި އަޑުގަދަކޮށް ވަޒީރަށް ސުވާލުކުރުމަށް ހުރަސް އެޅުމުން ޖާބިރުގެ ނަން އިއްވައިފި

ރައްޔިތުންގެ މަޖިލީހުގެ މިއަދުގެ ޖަލްސާގައި ކާށިދޫ ދާއިރާގެ މެންބަރު އަބްދުﷲ ޖާބިރުގެ ނަން އިއްވައިފި އެވެ.

މަޖިލީހުގެ ރިޔާސަތުގައި އިންނެވި ރައީސް މުހައްމަދު އަސްލަމް، ޖާބިރުގެ ނަން އިއްވާފައިވަނީ ތަޅުމުގައި އަޑުގަދަކޮށް، މެންބަރުންގެ ސުވާލަށް ޖަވާބު ދެއްވަން ހުންނެވި ވަޒީރު ސައީދަށް ވާހަކަ ދައްކަވަމުން އުނދަގޫކޮށް، ވާހަކަ ދައްކަން ހުރަސް އެޅުމުންނެވެ. ވަޒީރު ސައީދު މަޖިލީހުގެ ތަޅުމަށް ހާޒިރުކުރުމާއިއެކު ޖާބިރު ވަނީ މަޖިލީހުގެ އަޑުގަދަކޮށް ވާހަކަތަކަށް ހުރަސް އަޅުއްވާފައެވެ.

"އަޅުގަނޑު ހަނދާނަށް އަންނަނީ އަޅިގަނޑުގެ ޕާސްޕޯޓު ހިފެހެއްޓި މައްސަލަ. މީނާ އިކޮނޮމިކް މިނިސްޓަރުކަމުގައި އެމްއެމްޕީއާރްސީން ކުރި ވައްކަން ކޮބައިތޯ،" ނިޒާމީ ނުކުތާއެއް ނަންގަވައި ޖާބިރު ވިދާޅުވިއެެވެ.

އެއާއެކު ވެސް އެކި މެމްބަރުންގެ ފުރުސަތުތަކުގެ ތެރެއިން ޖާބިރު ގެންދެވީ އަޑުގަަދަ ކުރައްވަމުންނެވެ. ތަކުރާރުކޮށް ނަން އިއްވައި ތަޅުމުން ނިކުންނަށް ނަން އިއްވުމުން ވެސް ޖާބިރު ހުންނެވީއެވެ. އަދި ރިޔާސަތު ކުރިމަތީ ބިންތީގައި އިށީނދެ އިންނެވީއެވެ.

ޖާބިރުގެ ނަން މަޖިލީހުގެ ތަޅުމުގައި އިއްވި ނަމަވެސް، ޖާބިރު ވަނީ ބޭރަށް ނުނުކުމެ، މަޖިލީހުގެ ތަޅުމުގައި ވަނީ މަޑުކޮށްފައެވެ. އެހެންކަމުން ޖާބިރު މަޖިލީހުގައި ނެތް ކަމަށް ބަލައި ރިޔާސަތުގައި އިންނެވި އަސްލަމް ވަނީ ޖަލްސާ ކުރިއަށް ގެންދަވާފައެވެ.