ކުޅުދުއްފުށީގައި ހެދި އާ މަސް މާރުކޭޓް ހުޅުވައިފި

ކުޅުދުއްފުށީގައި ހެދި އާ މަސްމާރުކޭޓް ހުޅުވައި ބޭނުންކުރަން ފަށައިފި އެވެ. ހުކުރުދުވަހު ހަވީރު އެކަމަށްޓަކާ މަސްމާރުކޭޓް ސަރަހައްދުގައި ބޭއްވި ރަސްމިއްޔާތުގައި ޝަރަފްވެރިކޮށްދެއްވީ ކުޅުދުއްފުށީ ކައުންސިލްގެ ކުރީގެ ރައީސް އަލީ މުހަންމަދެވެ.

ކުޅުދުއްފުށީގައި މިހާރު ބޭނުންކުރަމުންދާ މަސް މާރުކޭޓަކީ އަލީ މުހައްމަދުގެ ދައުރުގައި ކައުންސިލްގެ ހަރަދުގައި ހެދި ތަނެކެވެ.

މި ރަސްމިއްޔާތުގައި ވާހަކަދައްކަވަމުން ސިޓީ ކައުންސިލްގެ ޑެޕިއުޓީ މޭޔަރު އަލީ އަހުމަދު ވިދާޅުވީ، ކުރީގެ ސަރުކާރުން ހެދި މި މަސް މާރުކޭޓަކީ ކުޅުދުއްފުށީ ކަހަލަ ބޮޑު އާބާދީއަކަށް އެންމެ އެކަށީގެންވާ މަސް މާރުކޭޓެއް ނޫން ކަމަށެވެ. އެހެންނަމަވެސް ކުރިއަށް އޮތްތަނުގައި ރަށަށް އެކަށީގެންވާ މަސް މާރުކޭޓެއް ހެދިގެން ދިޔުމަކީ ދެކެން ބޭނުންވާ ދުވަހެއް ކަމަށެވެ.

ސިޓީ ކައުންސިލުން ހަވާލުވިއިރު މަސް މާރުކޭޓްގެ މަސައްކަތް ގާތްގަނޑަކަށް ނިމިފައިވާކަން ފާހަގަކުރައްވާ އޭނާ ވިދާޅުވީ، އެކަމަކު އޭރުވެސް ޕްރޮޖެކްޓް އެއްކޮށް ނުނިމޭތީއާއެކު ޕްރޮޖެކްޓްގެ ތެރެއިން މާރުކޭޓްގެ ހިދުމަތް ހޯދާ ފަރާތްތަކާއި ހިދުމަތް ހޯދަންދާ ފަރާތްތަކަށް ފަސޭހަވާނެ ފަދަ ގޮތަކަށް ހިދުމަތް ލިބޭނެ މަގު ފަސޭހަވާނެ ގޮތަށް ގެނެވެން ހުރި ބަދަލުތައް ގެނައި ކަމަށެވެ.

އޭގެ ތެރޭގައި މަސްކަނޑާ އަށިތަކަށް ގެނެވިފައި ހުރި ބަދަލުތަކާއި މަސް ބަހައްޓާ އަށިތަކަށް ގެނެވިފައިވާ ބަދަލުތަކާއި މަސް ކަނޑާ ސަރަހައްދާއި މަސް ބަހައްޓާ ސަރަހައްދާއި ދޭތެރޭގައި ދަތުރުފަތުރުގެ ނިޒާމު ފަސޭހަކުރުމުގެ ގޮތުން ހުޅަނގު ފަރާތުގައި ދޮރެއް ކެނޑި އެވެ.

އަދި މާރުކޭޓްގެ ހުޅަނގު ފަރާތު ތޮއްޓާއި ދޭތެރޭގައި ރޭމްޕެއް ލެވިފައިވާކަމަށް ޑެޕިއުޓީ މޭޔަރު ފާހަގަކުރެއްވި އެވެ.

އަލީ ވިދާޅުވީ، ޕްރޮޖެކްޓް ނިންމަށްފަހުވެސް މާރުކޭޓް ހުޅުވުމާ ދޭތެރޭގައި މާރުކޭޓް ފުރިހަމަ ކުރުމަށް އަދި އެތަން ބޭނުންކުރާ ފަރާތްތަކަށް އެންމެ ފުރިހަމައަށް ތަން ހިފޭނެ ގޮތް ހެދުމަށްޓަކާ އިތުރު ބަދަލުތަކެއް ގެނެވިފައިވާނެކަމަށެވެ.

މި ރަސްމިއްޔާތުގައި ގިނަ އަދަދެއްގެ މަސްވެރިންނާއި އެ ދާއިރާގައި މަސައްކަތްކުރައްވާ ފަރާތްތައް ބައިވެރިވި އެވެ.