އަފީފުއްދީން ސްކޫލަށް އާ ޕްރިންސިޕަލެއް

ކުޅުދުއްފުށީގައި ހުންނަ އަފީފުއްދީން ސްކޫލްގެ ޕްރިންސިޕަލަކަށް ބޭފުޅަކު ހަމަޖައްސައިފި އެވެ. އަތޮޅުތެރޭގެ އެންމެ އާބާދީ ބޮޑު ސްކޫލުގެ ޕްރިންސިޕަލްގެ މަގާމަށް ހަމަޖެއްސެވި އަދުނާން އަލީ، މާދަމާ ސްކޫލާ ގުޅިވަޑައިގަންނަވާނެ އެވެ.

އަދުނާނު އެންމެ ފަހުން ހުންނެވީ ހދ ނޮޅިވަރަމް ސްކޫލުގެ ޕްރިންސިޕަލެއްގެ މަގާމުގައި އެވެ. އޭގެ އިތުރުން ށ ކޮމަންޑޫ އާއި ހދ ނޮޅިވަރަންފަރު ސްކޫލުގެ ޕްރިންސިޕަލްގެ މަގާމުވެސް އޭނާ އަދާކުރެއްވި އެވެ. އަދި ހަނިމާދޫ ސްކޫލް ކުޑަދުވަސް ކޮޅަކުން ހިންގެވި އެވެ.

އަފީފުއްދީން ސްކޫލްގެ ޕްރިންސިޕަލްގެ މަގާމުގައި އެންމެފަހުން އަދާކުރެއްވީ ނާސިހާ އިދުރީސް ހުޅުމާލޭގައި ހުންނަ ސޮލާހުއްދީން ސްކޫލަށް ބަދަލުވީ މިދިޔަ އަހަރުގެ ޖުލައިމަހުގެ ތެރޭގަ އެވެ. އެއަށްފަހު ސްކޫލު ހިންގެވީ ޑެޕިއުޓީ ޕްރިންސިޕަލް ޝަޒްނާ އިބުރާހިމެވެ.

ފައުންޑޭޝަން ގުރޭޑުން ފެށިގެން 10 އަކާހަމައަށް ކިޔަވައިދޭ އަފީފުއްދީން ސްކޫލުގައި މިއަހަރު 1000 އަކަށްވުރެ ގިނަ ދަރިވަރުން އަންނަނީ ތައުލީމު ހާސިލުކުރަމުންނެވެ.