އެއް މަސް ތެރޭ ހުރިހާ ކައުންސިލަކާއި ރައީސް ބައްދަލުކުރައްވަނީ

އެއް މަސްދުވަސްތެރޭ ހުރިހާ ރަށެއްގެ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ، ބައްދަލުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.

ތ އަތޮޅަށް ކުރައްވަމުން ގެންދަވާ ދަތުރުގެ ތެރެއިން އެ އަތޮޅު ކިނބިދުއަށް ވަޑައިގެން އެ ރަށު ރައްޔިތުންނާ މުހާތަބު ކުރައްވާ ރައީސް ވިދާޅުވީ މިހާރު ވެސް މަސައްކަތް ކުރަވަން ބޭނުންވެ ވަޑައިގަންނަވަނީ ލަފްޒީ މާނާގައި ރައްޔިތުންނާ ގާތުން ކަމަށެވެ. އެގޮތުން ރަށްރަށަށް ވަޑައިގެން ކައުންސިލާ ބައްދަލުކުރައްވަން ބޭނުންވެ ވަޑައިގަންނަވާ ކަމަށް އެމަނިކުފާނު ވިދާޅުވި އެވެ.

"އަޅުގަނޑު ހުންނަ ތަނަށް އޮފީހަށް ކައުންސިލް ގެނެސްގެން ކައުންސިލާ ބައްދަލުކުރާކަށް ނޫން ބޭނުންވަނީ. ކައުންސިލް އޮތް ތަނަށް ބައްދަލުކުރަން ދާން އަޅުގަނޑު ބޭނުންވަނީ" ރައީސް ވިދާޅުވި އެވެ.

ރައީސް ވިދާޅުވީ ރާއްޖެއިން ބޭރަށް ދިޔުމަށް ހަމަޖެހިފައިވާ ދަތުރު ނިންމާލުމަށްފަހު އެނބުރިވަޑައިގެން މަހެއްހާ ދުވަސްތެރޭ ހުރިހާ ކައުންސިލްތަކާއި އ.ތ.މ ކޮމިޓީތަކާއި ބައްދަލުކުރައްވާނެ ކަމަށެވެ. އަދި ރައްޔިތުން ބޭނުންވާ ކަންކަން ފަސޭހައިން ފަހިވާގޮތަށް ބައްޓަންކޮށްދެއްވައި، ރައްޔިތުންގެ ހުރިހާ މަންދޫބުންނާ ބައްދަލުކުރެއްވޭނެކަމަށް ރައީސް ވިދާޅުވިއެވެ.

"އަޅުގަނޑު ދޭނެ ޔަޤީންކަމަކީ އިރާދަކުރެއްވީ އިހުލާސްތެރިކަމާއެކީގަ ބުނާ ބަހުގެ އިތުބާރު ދަމަހައްޓަމުން، ރައްޔިތުން އެދޭގޮތަށް ހުރިހާ ކަމެއް ކޮށްދޭނެ ވާހަކަ". ރައީސް ވިދާޅުވިއެވެ.

ވެރިކަމާ ހަވާލުވެވަޑައިގެން އަތޮޅުތެރެއަށް ކުރައްވާ ފުރަތަމަ ދަތުރުފުޅުގައި ރައީސް ވަނީ ތ އަތޮޅަށް ވަޑައިގެންފައެވެ. އެ އަތޮޅުގެ 10 ރަށަކަށް ވަޑައިގެން އަތޮޅުގެ ހުރިހާ ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ވަނީ ބައްދަލުކުރައްވާފައެވެ.