ނަތަންޔަހޫ ހައްޔަރު ކުރުމުގެ އަމުރަކަށް އެދުމުން ރައީސް މަރުހަބާ ވިދާޅުވެއްޖެ

އިސްރާއީލްގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރުމުގެ އަމުރަށް ބައިނަލްއަގުވާމީ ޖިނާއީ ކޯޓު (އައިސީސީ)ގައި އެދުމަކީ ރާއްޖެއިން މަރުހަބާ ކިޔާ ކަމެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެެއެވެ.

ބޮޑުވަޒީރު ނަތަންޔާހޫގެ އިތުރުން އިސްރާއީލްގެ ޑިފެންސް މިނިސްޓަރު ޔޮއަވް ގަލަންޓް ހައްޔަރުކުރުމުގެ އަމުރަށް އައީސީސީގައި އެދިފައި ވަނީ ޗީފް ޕްރޮސެކިއުޓަރު ކާރިމް ޚާން ކޭސީއެވެ. އޭނާ ވިދާޅުވީ އޮކްޓޯބަރު ހަތް ވަނަ ދުވަހުން ފެށިގެން ޣައްޒާގައި ހިންގާފައިވާ ހަނގުރާމައިގެ ޖަރީމާތަކާއި އިންސާނިއްޔަތާ ދެކޮޅު ޖަރީމާތަކުގެ ޒިންމާ އެ ދެ ލީޑާރުން ނަގަން ޖެހޭ ކަމަށެވެ.

The #Maldives welcomes the filing of applications for warrants of arrest at the @IntlCrimCourt for the Prime Minister of Israel, Benjamin Netanyahu and the Minister of Defence of Israel, Yoav Gallant, by the ICC Prosecutor.

This marks a significant step in the quest for…

— Dr Mohamed Muizzu (@MMuizzu) May 20, 2024

ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ނަތަންޔާހޫ އާއި ގަލަންޓް ހައްޔަރުކުރަން އަމުރު ނެރުމަކީ ފަލަސްތީނުގެ ރައްޔިތުންނަށް އިންސާފު ހޯދައިދިނުމަށް އެޅުނު މުހިންމު ފިޔަވަޅެއް ކަމަށެވެ.

އެ މަނިކުފާނު ވިދާޅުވީ ހުރިހާ ގައުމެއްގެ މައްޗަށް ވެސް ބައިނަލްއަގުވާމީ ގާނޫނު ހިނގާނެ ކަމަށާއި ފަލަސްތީނުގައި ހަނގުރާމައިގެ ޖަރީމާތައް ހިންގާ މީހުން ކުށަށް ޒިންމާ ކުރުވަން ޖެހޭ ކަމަށެވެ.

މީގެ އިތުރުން، އިސްރާއީލުން ޣައްޒާގައި ހަނގުރާމައިގެ ޖަރީމާތަކާއި އިންސާނިއްޔަތާ ހިލާފު ޖަރީމާތައް ހިންގާފައިވާކަން ސާބިތުކުރެވޭ ވަރަށް ޕްރޮސެކިއުޓާސް އޮފީހުން ހެކި ހޯދާފައިވާ ކަމުގެ ޔަގީންކަން ރާއްޖެއަށް އޮތް ކަމަށް ވެސް ރައީސް ވިދާޅުވިއެވެ.

"ބައިނަލްއަގުވާމީ މައިދާނުގައި ފަލަސްތީނުގެ ރައްޔިތުންނަށް އެހީތެރިވެވެން އޮތް ހުރިހާ ގޮތެއް އަޅުގަނޑުމެން ބަލާނަން،" ރައީސް ވިދާޅުވިއެވެ.

އައިސީސީގެ ޗީފް ޕްރޮސެކިއުޓަރު ހުށަހެޅުއްވި މައްސަލަ އެ ކޯޓުގެ ތިން ފަނޑިޔާރުންގެ ޕެނަލަކުން ބައްލަވައި، ހައްޔަރުކުރުމުގެ އަމުރު ނެރުމާ ގުޅޭ ގޮތުން ގޮތެއް ނިންމަވާނެއެވެ.

އިސްރާއީލުން އޮކްޓޯބަރު ހަތެއްގެ ފަހުން ޣައްޒާގައި ހިންގަމުންދާ ލާއިންސާނީ ގަތުލު އާންމުގައި މިހާތަނަށް 35,562 އަށްވުރެ ގިނަ މީހުން ވަނީ ޝަހީދުކޮށްލާފައެވެ.