ކޮމިއުނިޓީ ސެންޓަރުގެ ކޯޓުތަކަށް ގެއްލުންދޭ މައްސަލަ ބޮޑުވެއްޖެ

ކުޅުދުއްފުށީ ޒޯން ސްޓޭޑިއަމްގެ ކޮމިއުނިޓީ ސެންޓަރުގައި ތަރައްގީކޮށްފައިވާ ކުޅިވަރު ކޯޓުތަކުގައިވާ ތަކެއްޗަށް ގެއްލުންދޭ މައްސަލަ ބޮޑުވެއްޖެ އެވެ.

ސިޓީ ކައުންސިލުން ބުނީ ކުޅުދުއްފުށި ކޮމިއުނިޓީ ސެންޓަރުގައި ގާއިމްކޮށްފައިވާ ޕޫލް ރޫމް، ޓޭބަލް ޓެނިސް ރޫމް، ޖިމް އަދި ބެޑްމިންޓަން ކޯޓަށް ބައެއް ފަރާތްތަކުން ގަސްތުގައި ގެއްލުންދެމުންދާކަން ފާހަގަކުރެވިފައިވާކަމަށެވެ. މިފަދަ އަމަލުތައް އެއްވެސް ފަރާތަކުން ނުކުރުމަށް ސިޓީ ކައުންސިލުން އިލްތިމާސް ކުރެއެވެ.

ކޮމިއުނިޓީ ސެންޓަރުގައި ގާއިމްކޮށްފައިވާ ކޯޓުތަކާއި ޖިމްއަކީ ސީސީޓީވީ ހަރުކުރެވިގެން ސިޓީ ކައުންސިލުން މޮނީޓަރކުރަމުން އަންނަ ތަންތަނެވެ.

ކޮމިއުނިޓީ ސެންޓަރުގައި ގާއިމްކޮށްފައިވަނީ 2 ބެޑްމިންޓަން ކޯޓާއި، ޕޫލް ރޫމް، ޓޭބަލް ޓެނިސް ރޫމެއް އަދި ޖިމްއެއްގެ އިތުރުން ފާހާނާ ބަރިއެކެވެ.