ހައްޖުގެ އަގު 50،000 އަށް ކުޑަކުރުމަކީ އަމާޒެއް: ޝަކީލް

ހައްޖު ކޯޕަރޭޝަންގެ ހަވާލުގައި ރާއްޖެއިން ހައްޖުގެ މަތިވެރި އަޅުކަން އަދާ ކުރުމަށް ކުރާ ދަތުރުގެ އަގު، 50،000 އަށް ކުޑަކުރުމުގެ މަސައްކަތް ކުރަމުން އަންނަކަމަށް ހައްޖު ކޯޕަރޭޝަންގެ މެނޭޖިން ޑިރެކްޓަރ މުހައްމަދު ޝަކީލް ވިދާޅުވެއްޖެވެ.

މިއަހަރުގެ ހައްޖުގެ މަތިވެރި އަޅުކަން އަދާކުރުމަށްޓަކައި މައްކާގައި ހުންނަވާ ދައުލަތުގެ މީޑިޔާ ޕީއެސްއެމް ނިއުސްއަށް ދެއްވި އިންޓަވިއުއެއްގައި، ރާއްޖެއިން މީހުން ހައްޖަށް ދިއުމަށް ރައްޔިތުންކުރާ ހޭދަ ކުޑަކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވަރަށް ބޮޑު އެދިވަޑައިގަތުމެއްކަމަށް ޝަކީލް ވިދާޅުވިއެވެ.

މަސައްކަތްކުރަނީ ކުރިއަށް އޮތް 3 އަހަރެއްހާ ދުވަހުގެ ތެރޭގައި ހައްޖު ދަތުރުތަކުގެ އަގު ކުޑަކުރުމަށް ކަމަށާއި، މިހާރު 69,965 ރުފިޔާއަށް ހައްޖު ދަތުރުކޮށްދިންނަމަވެސް ކުރިއަށް އޮތް ތަނުގައި ބޮޑުވެގެން 50،000 ރުފިޔާއަށް ދަތުރުގެ އަގު ކުޑަކުރުމަށް މަސައްކަތް ކުރައްވަމުންދާކަމަށް ޝަކީލް ވިދާޅުވިއެވެ.

އޭނާ ވިދާޅުވީ އެ ކުންފުންޏަކީ ފައިދާ ހޯދާ އަމިއްލަ ފައިމައްޗަށް ތެދުވެފައިވާ ކުންފުންޏަކަށް ހެދުމަށްވެސް މަސައްކަތް ކުރައްވަމުންދާކަމަށާއި، ރިއަލްއެސްޓެޓް ވިޔަފާރީގެ ދާއިރާއަށް ވަނުމުގެ މަސަައްކަތް ފަށާފައިވާކަމަށެވެ.

ހުޅުމާލެއިން ބިމެއް ގަނެ އެތަން ތަރައްގީކުރުމުގެ މަރުހަލާގައި އޮތްކަން ފާހަގަކުރައްވަމުން، އެކުންފުނިން އުމްރާއަށް ގެންދާ މީހުންގެ އަދަދު އިތުރުކޮށްގެންވިޔަސް ކުންފުނީގެ އާމްދަނީ އިތުރުކުރުމަކީ އަމާޒެއްކަމަށް އޭނާ ވިދާޅުވިއެވެ. އަދި އެހެނިހެން ޖަމާއަތްތަކުގެ ހަވާލުގައި އުމްރާގެ އަޅުކަން އަދާކުރުމަށް އަންނަ މީހުންގެ ހިދުމަތްތައް ހަމަޖައްސައިގެން އާމްދަނީ އިތުރުކުުރުމަށް މަސައްކަތް ކުރައްވަމުން ގެންދަވާކަމަށް ވިދާޅުވިއެވެ.

އާންމުންގެ އެ ކަންބޮޑުވުން ހައްލުކުރުމުގެ މަސައްކަތްތައް ކުރަމުން އަންނައިރު ހައްޖު ކޯޕަރޭޝަންގެ ހައްޖު ކިއު ކުޑަކުރުމަށާއި ހައްޖަށް ގެންދިޔުމަށް އިތުރަށް ފައިސާ ނަގާ މައްސަލަ ހައްލުކުރުމަށްޓަކައި ރާއްޖެއަށް ލިބޭ ހައްޖު ކޯޓާ ހަމައެކަނި ހައްޖު ކޯޕަރޭޝަނަށް ދިނުމަށް ސަރުކާރުންވަނީ ނިންމާފައެވެ. އަދި ރަސްމީ ކޯޓާގެ އިތުރަށް ކޯޓާ ލިބިއްޖެނަމަ ހައްޖަށް މީހުން ގެންދިޔުމުގެ ފުރުސަތު އަމިއްލަ ޖަމާއަތްތަކަށް ދިނުމަށް ހަމަޖެހިފައިވަނީ ހައްޖު ކޯޕަރޭޝަންގެ ލިސްޓުގައި ތިބި މީހުންގެ ތަރުތީބުންކަމަށް އިސްލާމީ ކަންތައްތަކާ ބެހޭ ވަޒީރު ވަނީ ވިދާޅުވެފައެވެ.