މިޔަރުގެ މަސްވެރިކަމަށް ފުރުސަތު ދިނުމަށް އަނެއްކާވެސް މޭޔަރު ގޮވާލައްވައިފި

މޫސުމީ މަސްވެރިކަމެއްގެ ގޮތުގައި، ވަކި ސަރަހައްދުތަކެއް ހާއްސަކޮށްގެން ނަމަވެސް މިޔަރުގެ މަސްވެރިކަންކުރުމުގެ ފުރުސަތު ދިނުމަށް ކުޅުދުއްފުށީ މޭޔަރު މުހައްމަދު އާތިފް، ސަރުކާރަށް ގޮވާލައްވައިފި އެވެ.

ރައީސް ޑރ މުހައްމަދު މުއިއްޒު ކުޅުދުއްފުއްޓަށް ވަޑައިގެން ބޭއްވެވި ޖަލްސާއެއްގައިވެސް މޭޔަރު އާތިފް ވަނީ މޫސުމީ މަސްވެރިކަމެއްގެ ގޮތުގައި މިޔަރުގެ މަސްވެރިކަންކުރުމުގެ ހުއްދަދިނުމަށް ރައީސްގެ އަރިހުން އެދިވަޑައިގަންނަވާފަ އެވެ.

މޭޔަރު އާތިފް މިރޭ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، 2000 ގެ އަހަރުތަކާ ހަމައަށް ކުޅުދުއްފުށީގެ އިގުތިސޯދަކީ ރާއްޖޭގެ ނިސްބަތުން އާރޯކަން ހުރި ތިޔާގި އިގުތިސޯދެއް ކަމަށެވެ. އޭގެ މައިގަނޑު ސަބަބަކީ މޭޔަރު ވިދާޅުވާގޮތުގައި ދެ ދާއިރާއަކުން ގިނަ އަދަދަކަށް ބޭރު ފައިސާ ކުޅުދުއްފުއްޓަށް ވަންނަމުންދިޔުންކަމުގަ އެވެ.

އެ ދެ ދާއިރާއަކީ ބޭރުގެ ޝިފިން ލައިންތަކުގައި ރަށުގެ ގިނަ އަދަދެއްގެ ސީމަނުން މަސައްކަތްކުރުމާއި ލޭނު މަސްވެރިކަން (މިޔަރުގެ މަސްވެރިކަން) ކޮށް ލޮނުމަސް އެކްސްޕޯޓްކުރުމުގެ ބޮޑު ސިނާއަތެއް ރަށުގައި އުފެދިފައިއޮތުންކަމަށެވެ. ރާއްޖޭގެ ނިސްބަތުން އެންމެ ގިނަ ސީމަނުން އުޅުނީ ކުޅުދުއްފުށީގަ އެވެ.

[މިޔަރުގެ] މަސައްކަތް ފުޅާވެފައިއޮތް މިންވަރަކީ މަސްވެރިން މިޔަރު ރަށަށް ގެނައުމުން، ރޮލަށް ރަށުން ބޭރުކުރުމުގެ ބަދަލުގައި ވެލިއުއެޑްކޮށް އަގު މައްޗަށް ޖެއްސުމުގެގޮތުން މަހާއި އުރަހާގައި ލޮނުއަޅާ ޓްރީޓްކުރުމުގެ މަސައްކަތް ރަށުގައިކޮށް، އެމަސައްކަތުގައި ޝާމިލްވެ ގިނަބަޔަކު ނަފާވެރިކަން ހޯދަމުންދިއުން." މޭޔަރު ވިދާޅުވި އެވެ.

"

އަދިވެސް ވަރަށް އާދޭހާއެކު ސަރުކާރަށް އަޅުގަނޑުމެން މި ގޮވާލަނީ ދިވެހި ކަނޑުފަޅުގެ ފުރިހަމަ ނަފާ ރައްޔިތުންނަށް ހޯދޭނޭ މަގަށް ސިޔާސަތުތައް ބައްޓަންކޮށްދެއްވާ، މިޔަރުގެ މަސްވެރިކަންކުރުމުގެ ފުރުސަތު ތަނަވަސްކޮށްދިނުމަށް.

ކުޅުދުއްފުށީ މޭޔަރު

"އޭރު ކުޅުދުއްފުށީގެ އިގުތިސޯދުގެ 60 އިންސަތަ އަށްވުރެ މަތިން ހިއްސާކުރާނީ ލޭނުގެ މަސްވެރިކަމޭ ބުނުމަކުން އަޅުގަނޑު ހިތުން ދޮގަށްނުވާނެ. އަދި އެކަމުގެ ނަފާ ސީދާގޮތުންނާއި ނުސީދާގޮތުން ނުފޯރާ އާއިލާއެއް ކުޅުދުއްފުށީގައި ނެތޭ ދެންނެވިޔަސް ރަނގަޅުވާނެ."

ޕޯސްޓްގައި މޭޔަރު ވިދާޅުވީ، ރައީސުލްޖުމްހޫރިއްޔާ ޑރ މުހައްމަދު މުއިއްޒު އާއި މަސްވެރިކަމާ ބެހޭ ވަޒީރާވެސް ބައްދަލުކުރައްވަ މޫސުމީ މަސްވެރިކަމެއްގެ ގޮތުގައި ވަކި ސަރަހައްދުތަކެއް ހާއްސަކޮށްގެން ނަމަވެސް އެ ހުއްދަ ދެއްވުމަށް ދަންނާވާފައިވާނޭ ކަމަށެވެ.

މިޔަރުގެ މަސްވެރިކަން ހުއްޓާލަން ޖެހުމާއެކު ކުޅުދުއްފުށީގެ އިގުތިސާދުގައި ރައްޔިތުންނަށް އަމިއްލައަށް ފޫބެއްދޭވަރަށްވުރެ ބޮޑު ބާގަނޑެއް އުފެދިގެންދިޔަ ކަމަށާއި އަދި އެކަން ފޫބެއްދޭނޭވަރުގެ އިތުރު އެހެން މަސައްކަތެއް ނުވަތަ އެކަމުން އަރައިގަތުމުގެ ފުރުސަތު އެއްވެސް ސަރުކާރަކަށް މިހާތަނަށް ފަހިކޮށްދެވިފަނެތްކަން މޭޔަރު ފާހަގަކުރެއްވި އެވެ.

ރާއްޖޭގައި އެންމެ ފުޅާ ދާއިރާއެއްގައި ލޭނު އަޅައިގެން މިޔަރުގެ މަސްވެރިކަން ކުރީ ކުޅުދުއްފުށީގަ އެވެ. އެ މަސައްކަތް މަނާކުރީ 2010 ވަނަ އަހަރު ރައީސް މުހައްމަދު ނަޝީދުގެ ވެރިކަމުގަ އެވެ.