މަސް ލިބުން ދަތިވެ، މިފްކޯގެ ފިހާރަތަކުން ކަނޑުމަހުގެ ބާވަތްތައް މަދުވެއްޖެ

ރާއްޖޭގައި މަސްވެރިކަން ދަށްވެ މަސްލިބުން ދަށަށް ދިޔުމުން، މޯލްޑިވްސް އިންޑަސްޓްރިއަލް ފިޝަރީސް ކޮމްޕެނީ (މިފްކޯ)ގެ މަސް ފިހާރަތަކުން ކަނޑުމަހުގެ ބާވަތްތައް ލިބުން ދަތިވެއްޖެއެވެ.

މިފްކޯއިން ބުނީ މިފްކޯ މަސް ފިހާރަތަކުން ކަނޑުމަހުގެ ބާވަތްތައް ހުސްވެގެން ޝަކުވާ ލިބެމުންދާ ކަމަށެވެ. އަދި މިފްކޯގެ މަސްފިހާރަތަކުން ކަނޑު މަހުގެ ބާވަތްތައް މިދުވަސްވަރު ހުސްވެފައިވަނީ ރާއްޖޭގައި މަސްވެރިކަން ދަށްވެ، ކިރާ މަހުގެ އަދަދުވެސް މިދުވަސްވަރު ދަށްވުމުން ކަމަށެވެ.

މިދުވަސްވަރު މިފްކޯއަށް މަސް ކިރާ މިންވަރު ދަށްވެފައިވީ ނަމަވެސް، ދަޅުމަސް ވިއްކުމުގައި އެއްވެސް ލިމިޓެއް ނުގެންގުޅޭ ކަމަށް އެކުންފުނިން ވަނީ ބުނެފަ އެވެ.

"ދަޅުމަހުގެ އެއްވެސް ލިމިޓެއް ނެތް. އެކަމަކު ކަޅުބިލަމަހުގެ އެހެނިހެން ބާވަތްތައް އުފެއްދޭނީ ކަޅުބިލަ މަސް ލިބިގެން. މިހާލަތުގައި ކަން މިގޮތަށް އޮތް ނަމަވެސް ކަންނެލި މަހުގެ އުފެއްދުންތައް ކުރިއެކޭ އެއްގޮތަށް މިފްކޯގެ ފިހާރަތަކުން ލިބެން ހުންނާނެ." މިފްކޯއިން ބުންޏެވެ.

މަސްވެރިކަން ރަނގަޅުވެ ކަޅުބިލަ މަސް ލިބެން ފެށުމާއެކު ކަޅުބިލަމަހުގެ ބާވަތްތަކުން ފިހާރައިގެ ރެކުތައް ފުރާލާނެ ކަމަށް މިފްކޯއިން ވަނީ ބުނެފަ އެވެ.

"ވެލިއު އެޑެޑް ޕްރޮޑަކްޓުގެ ތެރެއިން ކަޅުބިލަމަސް ނުލިބޭތީ ޕްރޮޑަކްޝަން ދަށްވެފައި މިހާރު އޮތީ. އެކަމަކު މަސްވެރިކަން ރަނގަޅުވުމާއެކު ފިހާރަތަކުގެ ރެކުތައް ފުރިގެންދާނެ،" މިފްކޯގެ ފަރާތުން މީޑިއާތަކަށް ފޮނުވި މެސެޖުގައި ބުނެފައިވެއެވެ.