ކޮރަލްސް އާއި ސެނޯންގެ ކުރިމަތިލުމަކުން ކުޅުދުއްފުށީ ޗެމްޕިއަންޝިޕް ފަށަނީ

ކުޅުދުއްފުށީގައި ބާއްވާ އެންމެ ޝަރަފްވެރި ކުޅިވަރު މުބާރާތްކަމުގައިވާ ކުޅުދުއްފުށި ޗެމްޕިއަންޝިޕްގައި މިމަހު ފަސްވަނަ ދުވަހު ފަށަން ހަމަޖެހިއްޖެ އެވެ.

މުބާރާތުގެ ގުރުއަތުލުން މިއަދު ކުރިއަށްދިޔައިރު ގުރުއަތު ނަންގަވައިދެއްވީ ކުޅުދުއްފުށީ ފުޓްބޯޅަ ދެ ލެޖެންޑްކަމުގައިވާ ސަމީރު ޔޫސުފާއި އަހުމަދު މޫސާ އެވެ.

ޖުމްލަ 8 ޓީމެއް ބައިވެރިވާ މި މުބާރާތުގައި ބައިވެރިވެފައިވަނީ ކުޅުދުއްފުށީގެ ހަތަރު ޓީމަކާއި ރަށުން ބޭރު ހަތަރު ޓީމެކެވެ.

މުބާރާތުގައި ވާދަކުރާ ޓީމްތައް

ދެ ގުރޫޕަށް ބަހާލައިގެން ކުޅޭ މިމުބާރާތް ފަށަނީ ކުޅުދުއްފުށީ ކުލަބް ކޮރަލްސް އާއި ނޭކުރެންދޫގެ ކުލަބް ސެނޯންގެ ކުރިމަތިލުމަކުންނެވެ. ކަޕް ފޯމެޓަށް ބާއްވާ މި މުބާރާތުގައި ކޮންމެ މެޗަކުންވެސް މޮޅުވާ ޓީމަކަށް ތިން ޕޮއިންޓް ލިބޭއިރު އެއްވަރުވެއްޖެނަމަ ދެޓީމަށް ވެސް 1 ޕޮއިންޓް ލިބޭނެ އެވެ. އަދި ބަލިވެއްޖަނަމަ އެއްވެސް ޕޮއިންޓެއް ނުލިބޭނެ އެވެ.

މުބާރާތުގެ ގަވައިދަކީ ފީފާގެ "ލޯސް އޮފް ދަ ގޭމް" އެވެ. މިއަހަރުގެ މުބާރާތުގައި ރެފްރީކަން ކޮށްދޭނީ ސްރީލަންކާގެ ރެފްރީންނެވެ. މޭޔަރު އާތިފްގެ އިސްނެންގެވުމަށް ކޮންމެ އަހަރަކު ބާއްވަން ފެށި މި މުބާރާތުގެ މަގްސަދަކީ ކުޅުދުއްފުށީގައި ކޮންމެ އަހަރަކުވެސް ގަވައިދުން ކުރިއަށް ދާނެ ފެންވަރު ރަނގަޅު ފުޓުބޯޅަ މުބާރާތެއް ބޭއްވުމާއި ކުޅުދުއްފުށީގެ ޒުވާނުންނަށާއި ފުޓުބޯޅަ ކުޅުމަށް ލޯބިކުރާ އެންމެހާ ފަރާތްތަކަށް މުބާރާތެއްގައި ވާދަކުރުމުގެ ފުރުސަތު ހޯދައިދިނުމެވެ.

އަދި ރަށުގެ ޒުވާނުންގެ ފުޓްބޯޅައިގެ ހުނަރު އިތުރުކޮށް ގައުމީ ފެންވަރުގައި ފުޓްބޯޅަކުޅޭ ޒުވާނުން އުފެއްދުމާއި ފުޓުބޯޅައަކީ ދިވެހިރާއްޖޭގެ އެންމެ ގިނަބަޔަކު ލޯބިކުރާ ކުޅިވަރަށް ވެފައި، ކުޅުދުއްފުއްޓަކީ ގައުމުގެ ފުޓުބޯޅަ ކުރިއެރުވުމަށް އެހީތެރިވާ ރަށެއް ކަމުގައި ހެދުމެވެ. އަދި ކުޅުދުއްފުށީގެ ފުޓްބޯޅަ މުޅިން އާ ހަރުފަތަކަށް ގެންދިއުމާއި ޒުވާނުން ކުށުގެވެށިން ދުރުކޮށް ރަށުގެ އިޖްތިމާއީ ރޫހު އާލާކޮށް ދިރުވުމެވެ.

ޒޯން ސްޓޭޑިއަމް ބާއްވާ މިމުބާރާތުގެ ފައިނަލް މެޗް އޮންނާނީ 21 އޯގަސްޓްގަ އެވެ. މިއަހަރުގެ ޗެމްޕިއަން ޓީމަށް 75000 ރުފިޔާ ހުށަހެޅިފައިވާއިރު ރަނަރަޕް ޓީމަށް 20000 ރުފިޔާ ހުށަހެޅިފައިވެ އެވެ.