އުރީދޫ ނޭޝަން ރޮކެޓް ލީގުގެ ގްލޯބަލް ފޭސްއޮފް މާދަމާ ފަށަނީ

ރާއްޖެ އާއި ގަތަރުގެ ޓީމުތައް ވާދަކުރާ ރޮކެޓް ލީގު މުބާރާތް ކަމަށްވާ އުރީދޫ ނޭޝަން ގްލޯބަލް ފޭސްއޮފްގެ ފުރަތަމަ މުބާރާތް މާދަމާ ފަށާނެ ކަމަށް އުރީދޫން ބުނެފި އެވެ.

އެ ކުންފުނިން ބުނީ މުބާރާތުގެ ގްރޫޕް ސްޓޭޖުގެ މެޗުތައް މާދަމާ އާއި ހުކުރު ދުވަހު ކުރިއަށް ގެންދާނެ ކަމަށާއި ޕްލޭއޮފް މެޗުތައް ހޮނިހިރު ދުވަހު އޮންނާނެ ކަމަށް ބުންޏެވެ. މި މެޗުތައް އުރީދޫ ނޭޝަން ޔޫޓިއުބް ޗެނަލް މެދުވެރިކޮށް ލައިވްސްޓްރީމް ކުރާނެ އެވެ.

މިއީ އުރީދޫ ނޭޝަންގެ ފުރަތަމަ ބައިނަލްއަގުވާމީ މުބާރާތެވެ. އީސްޕޯޓްސް ކޮމިއުނިޓީއެއް ކުރިއަރުވައި، ގޭމަރުންނަށް ދުނިޔޭގެ މައިދާނުގައި ވާދަކުރެވޭނެ ޕްލެޓްފޯމެއް ފަހިކޮށްދިނުމުގެ ގޮތުން ބާއްވާ މުބާރާތެއް ކަމަށް އުރީދޫން ބުންޏެވެ.

އުރީދޫ މޯލްޑިވްސްގެ ސީއީއޯ ހާލިދު އަލް ހަމާދީ ވިދާޅުވި ގޮތުގައި، އުރީދޫ ނޭޝަންގެ ފުރަތަމަ ބައިނަލްއަގުވާމީ އީސްޕޯޓްސް މުބާރާތް ރާއްޖެ އާއި ގަތަރުގެ ޓީމުތަކުގެ މެދުގައި ބޭއްވުމަކީ އުފާ ކުރައްވާ ކަމެކެވެ. މިއީ ކުރިއަރަމުން އަންނަ އީސްޕޯޓްސް ކޮމިއުނިޓީ އަށް އެހީތެރިކަން ފޯރުކޮށްދީ، އެ ކޮމިއުނިޓީ ކުރިއެރުވުމަށް ކުރާ މަސައްކަތުގެ ތެރެއިން ހިންގާ ހަރަކާތެއް ކަމަށް ވިދާޅުވި އެވެ. އަދި ރާއްޖެ އާއި ގަތަރާ ދެމެދު އޮތް އެކުވެރިކަމުގެ ވާދަވެރިކަމުގެ ރޫހާއި ހިތްގައިމު ގޭމްޕްލޭއެއް ފެންނާނެ ކަމަށް އުއްމީދު ކުރައްވާ ކަމަށް އޭނާ ވިދާޅުވި އެވެ.

މިއީ އުރީދޫ މޯލްޑިވްސްގެ 19 ވަނަ އަހަރީ ދުވަހުގެ މުނާސަބަތުގައި ބާއްވާ މުބާރާތެކެވެ. މި މުބާރާތުގެ ޗެމްޕިއަން ޓީމަށް 1،919 ޑޮލަރުގެ އިނާމު ވަނީ ހުށަހަޅައިފަ އެވެ.