ހުރިހާ މެޗަކުން މޮޅުވެ، ގުރޫޕް އެއްވަނައިގެ ގޮތުގައި ހަނިމާދޫ ޒުވާނުންގެ ޖަމިއްޔާ ސެމީއަށް

ކުޅުދުއްފުށި ޗެމްޕިއަންޝިޕުގެ ގުރޫޕް ސްޓޭޖުގެ ފަހު މެޗުގައި މިއަދު ހަނިމާދޫ ޒުވާނުންގެ ޖަމިއްޔާ އާއި ޒިގްޒެގް ފޯރ ޔޫތް ލިންކޭޖް ބައްދަލުކުރި މެޗު ހަނިމާދޫއިން ކާމިޔާބު ކޮށްފި އެވެ.

މިއަދުގެ މެޗު ހަނިމާދޫއިން ކާމިޔާބު ކުރީ ފަސޭހަކަމާއެކު 5 - 2 ން ޒިގްޒެގް ބަލިކޮށްފަ އެވެ. މިމެޗުގައި ހަނިމާދޫގެ ފަރާތުން ވަނީ ވަރަށް ރީތި މޮޅު ކުޅުމެއް ފެނިގެން ގޮސްފަ އެވެ.

މިއަދުގެ މެޗުގައި ފުރަތަަމަ ލަނޑު ޖަހާ ލީޑް ނެގީ ޒިގްޒެގުންނެވެ. މިލަނޑަކީ އެޓީމުގެ ބިދޭސީ ފޯވާޑް ޕްރިންސް ލާބީ 24 ވަނަ މިނެޓުގައި ކާމިޔާބުކޮށްދިން ލަނޑެކެވެ. ނަމަވެސް މިލަނޑާއެކު ހަނިމާދޫއިން ވަނީ ކުޅުން ވަރުގަދަކޮށް 3 މިނެޓު ތެރޭގައި ނަތީޖާ އެއްވަރުކޮށްފަ އެވެ.

ހަނިމާދޫއަށް 27 ވަނަ މިނެޓުގައި މެޗުގެ ނަތީޖާ ހަމަހަމަ ކޮށްދިނީ ހުސައިން ރަމީޒު އެވެ. މިލަނޑަށްފަހު މެޗު އިތުރަށް ފޯރިގަދަ ވެގެންދިޔަ އެވެ. ނަމަވެސް އަނެއްކާވެސް ޒިގްޒެގުން ވަނީ އޭގެ 10 ވަރަކަށް މިނެޓު ފަހުން ލީޑު ނަގާފަ އެވެ. މިއީ އަބޫބަކުރު އާދަމް ކާމިޔާބުކޮށްދިން ލަނޑެކެވެ.

މިއާއެކު ހަނިމާދޫ ވެސް ޕްރެޝަރަށް ވެއްޓުނެވެ. މެޗުގެ ފުރަތަަމަ ހާފު ނިމުނީ 2 - 1 ން ޒިގްޒެގް ކުރީގައި އޮވެގެންނެވެ. ދެވަނަ ހާފަށް ދެޓީމުން ވެސް ވަރުގަދަކޮށް ނުކުތްއިރު ހަނިމާދޫއިން ވަނީ ކުޅުން ރަނގަޅުކޮށް މެޗުގެ ނަތީޖާ ދެވަނަ ފަހަރަށް އެއްވަރުކޮށްފަ އެވެ.

މެޗުގެ 50 ވަނަ މިނެޓުގައި ހަނިމާދޫގެ މުހައްމަދު އަލީ އެޓީމަށް ނަތީޖާ އެއްވަރުކޮށްދިންއިރު އޭގެ ދެ މިނެޓްފަހުން އަނެއްކާވެސް އޭނާ ވަނީ ލަނޑެއް ޖަހައި އެޓީމަށް ލީޑު ނަގައިދީފަ އެވެ. ކައިރި ކައިރީގައި މުހައްމަދު އަލީގެ ފަރާތުން ދެލަނޑު ފެނުނުއިރު ޒިގްޒެގުން ވެސް ވަނީ ލަނޑެއް ޖަހަން މަސައްކަތް ކޮށްފަ އެވެ.

ޒިގްޒެގުން ލަނޑެއް ޖެހޭތޯ މަސައްކަތް ކުރަމުން ދަނިކޮށް އެޓީމު ޕްރެޝަރަށް ވައްޓާލީ 75 ވަނަ މިނެޓުގައި މުހައްމަދު އަލީ އޭނާގެ ހެޓްރިކް ފުރިހަމަ ކޮށް ހަނިމާދޫއަށް ދެލަނޑުގެ ލީޑެއް ނަގައިދިން ހިސާބުންނެވެ. ހަނިމާދޫގެ 5 ވަނަ ލަނޑަކީ 93 ވަނަ މިނެޓުގައި އެޓީމުގެ ނާއިލް ޔޫސުފް ކާމިޔާބުކޮށްދިން ލަނޑެކެވެ.

މިމޮޅާއެކު ކުޅުނު ހުރިހާ މެޗަކުން މޮޅުވެ ހަނިމާދޫ މުބާރާތުގެ ސެމީއަށް ގްރޫޕުގެ އެއްވަނައިގައި ދަތުރުކުރިއިރު ދެވަނައިގައި ޒިގްޒެގު މިވަނީ ސެނީއަށް ދަތުރުކޮށްފަ އެވެ. މިމުބާރާތުގެ ސެމީގައި ބައްދަލުކުރާނީ ކުލަބް ކޮރަލްސްއާއި ހަނިމާދޫ ޒުވާނުންގެ ޖަމިއްޔާ އަދި ޒިގްޒެގް ފޯރ ޔޫތް ލިންކޭޖާ ކުލަބް ޑޮމިނޭޓާސް އެވެ.