ވިއްސާރައާ ގުޅިގެން މާދަމާ ގުރޭޑް 7 އަކުން ދަށަށް ސްކޫލް ބަންދުވާނެ

ކުޅުދުއްފުއްޓަށް މިހާރު ކުރަމުންދާ ބޯވިއްސާރައާ ގުޅިގެން މާދަމާ ގުރޭޑް 7 ދަށުގެ ދަރިވަރުންނަށް ސްކޫލް ބަންދުވާނެކަމަށް މޭޔަރު މުހައްމަދު އާތިފް ވިދާޅުވެއްޖެ އެވެ.

މޭޔަރު ވިދާޅުވީ މިގޮތަށް ނިންމީ އެޑިއުކޭޝަން މިނިސްޓްރީ އާއި ސިޓީ ކައުންސިލް އަދި ކުޅުދުއްފުށީގެ ސްކޫލްތަކުގެ ޕްރިންސިޕަލުން މެދުގައި މަޝްވަރާކުރެވުމަށްފަހު ކަމަށެވެ. މޭޔަރު ވިދާޅުވީ ގުރޭޑް 7 އަކުން ދަށުގެ ދަރިވަރުންނަށް މާދަމާ ސްކޫލް ބަންދުވިނަމަވެސް ގުރޭޑް 8 ފެށިގެން މަތީގެ ދަރިވަރުންނަށް ކިޔެވުން އޮންނާނެކަމަށެވެ.

މިއަދު މެންދުރުފަހު 3 ޖެހީންސުރެއް ކުޅުދުއްފުއްޓަށް އަންނަނީ ބޯކޮށް ވާރޭވެހެމުންނެވެ. އެހެންވުމުން ފެންބޮޑުވެ 100 އަށްވުރެ ގިނަ ގޭބިސީތަކަށް ފެންވަދެ ގެއްލުވި އެވެ. އަދި 6 ސަރަހައްދެއްގައި ޕަމްޕް ޖަހައިގެން ފެން ހިއްކުމުގެ މަސައްކަތް އަންނަނީ ކުރަމުންނެވެ.

މި މަސައްކަތުގައި ސިޓީ ކައުންސިލާއި ފުލުހާއި ދިވެހި ރެޑްކުރެސެންޓް، ޕަބުލިކް ވާރކްސް، ވެމްކޯ، އެސްޓީއޯ، އާރުޑީސީ އަދި ކުޅުދުއްފުށީގައި ހުރި ސަރުކާރުގެ ކުންފުނިތަކުގެ މުވައްޒަފުންނާއި އާންމުން އަންނަނީ މަސައްކަތްކުރަމުންނެވެ.