ސިޔާސީ މުވައްޒަފުންގެ އަދަދު ހާމަކުރަން ގޮވާލައި ހުށަހެޅި ކުއްލި މައްސަލަ ބޭރުކޮށްލައިފި

ސަރުކާރުގެ ސިޔާސީ މަގާމުތަކުގައި ތިބި މީހުންގެ އަދަދާއި އެ މީހުންގެ މަސްއޫލިއްޔަތު ހާމަކުރުމަށް ގޮވާލައި، ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބޭރުކޮށްލައިފިއެވެ.

ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ހުށަހެޅުއްވި ކުއްލި މައްސަލާގައި ވަނީ ދައުލަތުގެ ހަރަދުތައް ކުޑަކުރަން ސިޔާސީ މުވައްޒަފުންގެ މުސާރަ ކުޑަކުރަން ނިންމާފައިވާއިރު، މިއަދާ ހަމައަށް ވެސް ސިޔާސީ މުވައްޒަފުންގެ ޖުމްލަ އަދަދު ހާމަކޮށްފައި ނުވާ ކަމަށެވެ.

ކުއްލި މައްސަލާގައި ވަނީ ސިޔާސީ މުވައްޒަފުންގެ އަދަދާއި މަގާމު ހާމަކުރަން ގޮވާލައިފަ އެވެ.

މި ކުއްލި މައްސަލަ ތަޅުމުން ބޭރުކޮށްލާފައިވަނީ 59 މެންބަރުންގެ ވޯޓުންނެވެ. ބަލައިގަންނަން ފެންނަ ކަމަށް ވޯޓު ދެއްވީ 8 މެންބަރުންނެވެ.

ދައުލަތުގެ ހަރަދު ކުޑަކުރަން މި ސަރުކާރުން އަޅަމުން އަންނަ ފިޔަވަޅުތަކުގެ ތެރެއިން، ސިޔާސީ މުވައްޒަފުންނާއި ދައުލަތުގެ ތިން ބާރުގެ އިސް ބޭފުޅުންނާއި މިނިވަން މުއައްސަސާތަކުގެ ވެރިންނާއި މަޖިލީހުގެ މެމްބަރުންނާއި ސަރުކާރު ކުންފުނިތަކުގެ އިސްވެރިންގެ މުސާރައިން 10 ޕަސެންޓް ދެ އަހަރު ދުވަހުގެ މުއްދަތަށް އުނިކުރުމަށް ރައީސް މުއިއްޒު ވަނީ ނިންމަވައިފަ އެވެ.

އޭގެ ކުރިން ރައީސް ވަނީ، ހަރަދު ކުޑަކުރުމުގެ ގޮތުން ސަރުކާރުން 228 ސިޔާސީ މުވައްޒަފުން ވަކި ކުރަން ވެސް ނިންމަވައިފަ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާ ބޭއްވީ، ދައުލަތުން ހުށަހަޅާ ސަޕްލިމެންޓަރީ ބަޖެޓު ހުށަހެޅުމަށާއި ބަޖެޓުގެ މަސައްކަތް ކުރިއަށް ގެންދިއުމަށެވެ.