މިއަހަރުވެސް ނަޞްރުގެ ދުވަސް ކުލަގަދަކޮށް ކުޅުދުއްފުށީގައި ފާހަގަކުރަނީ

މިއަހަރުވެސް ކުލަގަދަކޮށް ނަޞްރުގެ ދުވަސް ކުޅުދުއްފުށީގައި ފާހަގަކުރަން ނިންމާފައިވާކަމަށް ސިޓީ ކައުންސިލުން ބުނެފި އެވެ. މިއަހަރު ނަޞްރުގެ ދުވަސް ފާހަގަކުރަނީ އަފީފުއްދީން ސްކޫލާ ގުޅިގެންނެވެ.

ސިޓީ ކައުންސިލް އިންތިހާބުވިފަހުން ކުޅުދުއްފުށީ ސްކޫލުތަކާ ގުޅިގެން ނަޞްރުގެ ދުވަސް އަންނަނީ ކުލަގަދަކޮށް ފާހަގަކުރަމުންނެވެ. އެ ގޮތުން މިއީ ކުލަގަދަކޮށް މި ދުވަސް ފާހަގަކުރާ 4 ވަނަ އަހަރެވެ.

މިއަހަރު ނަޞްރުގެ ދުވަސް ފާހަގަކުރުމުގެ ގޮތުން ކުޅުދުއްފުށީ ތިން ސްކޫލްގެ ދަރިވަރުން ބާއްވާ ޕެރޭޑް އޮންނާނެ އެވެ. ކެޑޭޓް ދަރިވަރުންގެ މި ޕެރޭޑް އޮންނާނީ އޮންނާނީ ނޮވެމްބަރު 2 ވަނަ ދުވަހުގެ ހަވީރު އެވެ.

މީގެ އިތުރުން މިއަހަރުގެ ނަޞްރުގެ ދުވަހާ ގުޅުވައި ކުޅުދުއްފުށީގެ 3 ސްކޫލުގެ ދަރިވަރުންގެ މެދުގައިވަނީ ޕޯސްޓަރ ކުރެހުމުގެ މުބާރާތެއް ބާއްވާފަ އެވެ. މި މުބާރާތުގެ ނަތީޖާ ފާޅުކުރުމަށް ހަމަޖެހިފައިވަނީ ނަޞްރުގެ ދުވަހުގެ ރަސްމީ ޖަލްސާގަ އެވެ.

ކުޅުދުއްފުށީގައި ބާއްވާ ނަޞްރުގެ ދުވަހުގެ ޖަލްސާ އޮންނާނީ ނޮވެމްބަރު 3 ވަނަ ދުވަހުގެ ރޭގަނޑު ރަންމަތި ފަންނުގަ އެވެ.

ނޮވެމްބަރު ތިނެއްގެ ބަތަލް ޝަހީދު ހުސެއިން އާދަމް ނިސްބަތްވަނީ ކުޅުދުއްފުއްޓަށެވެ. އެ ބޭފުޅާގެ ޒިކުރާއާކުރުމުގެ ގޮތުން މި ދުވަސް ކުލަގަދަކޮށް ސިޓީ ކައުންސިލުން ފާހަގަކުރެ އެވެ. އަދި ޝަހީދު ހުސެއިން އާދަމްގެ ބިނާއެއް ހެދުމުގެ މަސައްކަތްވެސް ސިޓީ ކައުންސިލުން އަންނަނީ ކުރަމުންނެވެ.