ނޮޅިވަރަމު ކައުންސިލާއި އެރަށު ޖަމިއްޔަތުއްރިސާލާއާ ގުޅިގެން ޑރ. އާދަމް ޝަމީމްގެ ހާއްސަ ދަރުހެއް ބާއްވަނީ

ހދ. ނޮޅިވަރަމުގައި ދީނީ އިޖުތިމާއީ ހަރަކާތްތައް ހިންގާ ޖަމިއްޔާއެއް ކަމަށްވާ ޖަމިއްޔަތުއްރިސާލާއިން އާއި ނޮޅިވަރަމް ކައުންސިލާ ގުޅިގެން އިންތިޒާމުކުރާ "އަޖަލު މާ ގާތޭ އިނގޭ" މައުޟޫއަށް ޑރ. އާދަމް ޝަމީމްގެ ހާއްސަ ދަރުހެއް ބޭއްވުމަށް ހަމަޖެހިއްޖެއެވެ. މި ދަރުސް އޮންނާނީ މި ނޮވެންބަރުމަހުގެ 29 ވާ ހުކުރު ދުވަހުގެ ރޭ 20:30 ގައި ނޮޅިވަރަމު ބަނދަރުގައެވެ.

ޖަމިއްޔަތުއްރިސާލާގެ ރައީސް އަލީ އަސްްލަމް މި ނޫހަށް މައުލޫމާތު ދިން ގޮތުގައި މި ދަރުހުގެ މައިގަނޑު މަޤްޞަދަކީ ރާއްޖޭގައި ފަހަކަށް އައިސް ހިނގާފައިވާ ބައެއް ހިތާމަވެރި ހާދިސާތަކުން އިބުރަތް ހާސިލްކޮށް، މުޖުތަމަޢުގެ ހުރިހާ ފަންތިއެއްގެ މީހުންނަށް, މަރުވުމަކީ ކޮންމެ ވަގުތެއްގައިވެސް ދިމާވެދާނެ ކަމެއްކަން ހަނދާންކޮށްދިނުމެވެ.

"މުސްކުޅިން، ޒުވާނުން، އަންހެނުން، ފިރިހެނުން، ކުޑަކުދިން، މި ހުރިހާ ބަޔަކަށްވެސް ކޮންމެ ވަގުތަކު މަރާ ކުރިމަތިލާން ޖެހިދާނެ. އެހެންވީމާ، އަޅުގަނޑުމެން ބޭނުންވަނީ މި ހަޤީޤަތް ހަނދާންކޮށްދީ، އިސްލާމްދީނުގެ ތެދުމަގަށް ރުޖޫޢަވުމަށް ބާރުއެޅުމަށް," އަލީ ވިދާޅުވިއެވެ.

ދަރުސް ދެއްވުމަށް ހަމަޖެހިފައިވާ ޑރ. އާދަމް ޝަމީމަކީ ރާއްޖޭގެ ގިނަ ބައެއްގެ ލޯބި ލިބިފައިވާ، އަސަރުގަދަ ގިނަ ދަރުސްތަކެއް ދެއްވާފައިވާ ބޭފުޅެކެވެ. އެމަނިކުފާނުގެ ދަރުސްތަކުގެ ސަބަބުން ގިނަ ބަޔަކު ހެޔޮމަގަށް އެނބުރި، އިސްލާމްދީނުގެ ރިވެތި އުސޫލުތަކަށް އަމަލުކުރަން ފަށާފައިވާކަން ފާހަގަކުރެވެއެވެ.

މި ދަރުސް ދާރިސް ޓީވީއިން ލައިވްކޮށް ދައްކާނެ ކަމަށް ޖަމިއްޔަތުއްރިސާލާއިން މައުލޫމާތު ދެއެވެ. މީގެ އިތުރުން، ކައިރި ރަށްރަށުން އެކަށީގެންވާ ތަރުހީބެއް ލިބޭނަމަ، ދަރުހަށް ދިއުމަށް ޚާއްޞަ ފެރީ ދަތުރުތަކެއް ބޭއްވުމަށް ގަސްތުކުރާ ކަމަށްވެސް ޖަމިއްޔާއިން ބުނެފައިވެއެވެ.

"އަޅުގަނޑުމެން ވަރަށް ބޮޑަށް އުންމީދުކުރަން ވީހާވެސް ގިނަ ބަޔަކު މި ދަރުހުގައި ބައިވެރިވާނެ ކަމަށް. ހާއްސަކޮށް ޒުވާނުންނާއި ކުޑަކުދިން މިކަހަލަ ދަރުސްތަކަށް އަހުލުވެރިވުމަކީ ވަރަށް މުހިންމު ކަމެއް" އަލީ އަސްލަމް ވިދާޅުވި އެވެ.

ދަރުހުގެ ބައިވެރިންގެ ޝައުޤުވެރިކަން އިތުރުކުރުމަށްޓަކައި، ބައިވެރިންގެ ތެރެއިން ގުރުއަތުން ހޮވޭ ފަރާތަކަށް އިނާމެއްގެ ގޮތުގައި ފޯނެއް ލިބޭނެ ކަމަށްވެސް ޖަމިއްޔާއިން ހާމަކޮށްފައިވެއެވެ.