ރާއްޖެފަދަ ގައުމުތަކަށް ދުނިޔޭގެ އެހީތެރިކަމާއި އެއްބާރުލުން ބޭނުންވޭ: ޒަމީރު

އެކިއެކި ހަނގުރާމަތަކާއި ކާރިސާތަކުގެ ސަބަބުން ދުނިޔޭ އިގުތިސާދު މިހާރު އޮތް ނާޒުކު ފައްތަރުން އަރަގަތުމަށް ރާއްޖެ ފަދަ ކުދި ގައުމުތަކަށް ބައިނަލްއަގުވާމީ މާލީ އެހީ ފޯރުކޮށްދިނުމަކީ މުހިންމު ކަމެއް ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.

އިންޑިއާގައި މި އަހަރުގެ ގްލޯބަލް އިކޮނޮމިކް ޕޮލިސީ ފޯރަމުގައި ވާހަކަދައްކަވަމުން މިނިސްޓަރު ޒަމީރު ވިދާޅުވީ، ކޮވިޑް 19ގެ ދުވަސްވަރުގައި ގިނަ ގައުމުތަކަށް ދަރަނި ނަގަން މަޖުބޫރުވި ކަމަށާއި މިހާރު އެ ގައުމުތަކަށް ކުރިމަތިވަނީ އެ ދަރަނި ބަލަހައްޓައިގެން މެނޭޖުކުރުމުގެ ގޮންޖެހުން ކަމަށެވެ.

އެހެންވެ، ދަރަނި ބެލެހެއްޓުމާއި އާމްދަނީ އިތުރުކުރުމަށް ދެމެހެއްޓެނިވި ގޮތްތަކެއް ހޯދަން ޖެހޭކަން މިނިސްޓަރު ވަނީ ފާހަގަކުރައްވާފައެވެ.

ރާއްޖޭގައި އިއާދަކުރަނިވި ހަކަތައިގެ މިންވަރު އިތުރުކޮށް، މޫސުމީ ބަދަލުތަކުން އަރައިގަނެ ތަރައްގީ ގެނައުމަށް ކުރަމުންދާ މަސައްކަތްތަކުގައި ކަނޑައަޅާފައިވާ އަމާޒަށް ވާސިލުވާން ބޭރު ގައުމުތަކުގެ އެހީތެރިކަން މުހިންމު ކަމަށް މިނިސްޓަރު ވަނީ ވިދާޅުވެފައެވެ.

އިތުރަށް މިނިސްޓަރު ވިދާޅުވީ، ރާއްޖޭގައި ބޭނުންކުރާ ހަކަތައިގެ 33 އިންސައްތައަކީ އިއާދަކުރަނިވި ހަކަތައަށް ބަދަލުކުރަން އަމާޒު ހިފާފައިވާ ކަމަށާއި މިފަދަ ލަނޑުދަނޑިތައް ހާސިލްކުރަން ގުޅިގެން މަސައްކަތް ކުރަން ޖެހޭ ކަމަށެވެ.

މީގެއިތުރުން، މޫސުމީ ބަދަލުތަކަށް ވިސްނައިގެން ތަރައްގީގެ މަޝްރޫއުތަކަށް އިންވެސްޓުކުރަން ޖެހޭ ކަމަށާއި އެކަމަށް ބޭނުންވަނީ އީޖާދީ ވިސްނުން ކަމަށް މިނިސްޓަރު ވިދާޅުވެފައިވެއެވެ.