އަންނަ އަހަރު ހަނިމާދޫ އެއާޕޯޓުން ހިދުމަތް ދޭން ފަށާނެ: އާރްއޭސީއެލް

އިންޑިއާގެ އެހީގައި ތަރައްގީކުރާ ހަނިމާދޫ އިންޓަނޭޝަނަލް އެއާޕޯޓުގެ މަސައްކަތް ނިމައި އަންނަ އަހަރުގެ މެދުތެރޭގައި ހިދުމަތް ދޭން ފަށަނެކަމަށް ރީޖަނަލް އެއަޕޯޓްސް ކޮމްޕެނީ (އާރްއޭސީއެލް)އިން ބުނެފިއެވެ.

ދައުލަތުގެ މީޑިއާ ޕީއެސްއެމްގެ ޕްރޮގްރާމެއްގައި މި އެއާޕޯޓާއި ގުޅޭ މައުލޫމާތު ދެއްވަމުން ރީޖަނަލް އެއާޕޯޓްސް ކުންފުނީގެ މެނޭޖިން ޑިރެކްޓަރ އަހުމަދު މުބީން ވިދާޅުވީ އެއަޕޯޓް މަޝްރޫއުގެ 77 އިންސައްތަ މަސައްކަތް މިހާރު ނިމިފައިވާކަމަށާއި މިވަގުތު ކުރިއަށްދަނީ ފަސިންޖަރ ޓާމިނަލްގެ މަސައްކަތްކަމަށެވެ.

ހަނިމާދޫ އެއާޕޯޓު ތަރައްގީކުރުމުގެ މަޝްރޫއަކީ އުތުރުގައި ކުރިއަށްދާ އެންމެ ބޮޑު ތަރައްގީގެ މަޝްރޫއެވެ. މި މަޝްރޫއަކީ އިންޑިއާގެ އެގްޒިމް ބޭންކުގެ ލޯނު އެހީގެ ދަށުން ކުރިއަށްދާ މަޝްރޫއެކެވެ. މި މަޝްރޫއުގެ ދަށުން އަހަރަކު 1.3 މިލިއަން ފަތުރުވެރިންނަށް ހިދުމަތްދެވޭނެ ފެންވަރުގެ ޓާމިނަލް އިމާރާތެއް އެޅުމާއި، ބޮޑެތި މަތިންދާބޯޓުތައް ޖެއްސޭ ވަރުގެ ދިގު ރަންވޭއެއް އެޅުމާއި، ކޮންޓްރޯލް ޓަވަރާއި ހެންގަރުތައް އެޅުމުގެ އިތުރުން އެހެނިހެން ވަސީލަތްތައް ގާއިމުކުރުން ހިމެނެއެވެ.

އޭނާ ވިދާޅުވީ މި މަޝްރޫއުގެ ދަށުން ތަރައްގީކުރާ އެއާޕޯޓުގެ ކާގޯ ޓާމިނަލުގެ މަސައްކަތުގެ ވެސް 90 އިންސައްތަ މަސައްކަތް ނިންމާފައިވާކަމަށާއި، އެއާޕޯޓް ޓަވަރުގެ 88 އިންސައްތަ މަސައްކަތް ނިންމިފައިވާކަމަށެވެ.

އަދި ބައެއް ސަބަބުތަކާ ހުރެ މަސައްކަތްތަކަށް ލަސްތަކެއް އައިނަމަވެސް، މުޅި މަޝްރޫއުގެ މަސައްކަތް އަންނަ އަހަރުގެ މެދުތެރޭގައި ނިންމައި، ހުޅުވޭވަރު ވާނެކަމަށެވެ.

މިމަޝްރޫޢުގެ މަސައްކަތް ފެށީ މިދިޔަ އަހަރުގެ ޖެނުއަރީ މަހުގެ ތެރޭގައެވެ. މި މަޝްރޫއުގެ ދަށުން ތަރައްޤީކުރި 2465 މީޓަރުގެ ދިގު ރަންވޭ މަސައްކަތް މިހާރު ވަނީ ނިންމާފައެވެ.

މި އެއަރޕޯޓް ތަރައްޤީކުރަނީ އަހަރަކު 1.3 މިލިއަން ފަތުރުވެރިންނަށް ޚިދުމަތް ދެވޭ ފެންވަރަށެވެ.

ހަނިމާދޫ އެއާޕޯޓަށް ގެންނަ ބަދަލާއެކު، ހަނިމާދޫ ވެގެންދާނީ ރާއްޖޭގެ އުތުރު ސަރަޙައްދުގެ ވައިގެ ދަތުރުފަތުރުގެ މައި ދޮރާއްޓަށެވެ. މީގެ ސަބަބުން ހަނިމާދޫއާއި އެ ސަރަޙައްދުގެ ފަތުރުވެރިކަމާއި، އިގްތިސާދީ ދުވެލި އަދި ލޮޖިސްޓިކްސްގެ ހިދުމަތްތައް ކުރިއަރައިގެންދާނެ ކަމަށް ބެލެވެއެވެ.