މިއަހަރާއި އަންނަ އަހަރުގެ ގައުމީ ދުވަސް އުތީމުގައި ފާހަގަކުރަން ރައީސް ނިންމަވައިފި

ދެ އަހަރަށް ދެމިގެންދާ މަޝްރޫއުއެއް ގޮތަށް ހއ. އުތީމުގައި ގައުމީ ދުވަސް ފާހަގަކުރަން ނިންމާފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފި އެވެ.

ހއ. އަތޮޅަށް ކުރައްވާ ދަތުރުފުޅުގައި އުތީމަށް މިއަދު ވަޑައިގެން ރައްޔިތުންނާ ބައްދަލުކުރައްވައި ރައީސް ޑރ މުއިއްޒު ވިދާޅުވީ އެ ރަށަށް ވަޑައިގެންނެވުމުން ހާއްސަ އިހުސާސުތަކެއް ކުރެއްވޭ ކަމަށާ، އެއީ ގައުމީ އިހުސާސުތަކެއް ކަމަށެވެ.

ރައީސް ވިދާޅުވީ، އުތީމުގައި ގައުމީ ދުވަސް ފާހަގަކުރުމަކީ ކޮންމެ ދައުރެއްގައި ވެސް ކޮންމެވެސް އެއް އަހަރަކު އެ އިރެއްގައި އޮންނަ ސަރުކާރަކުން ކުރަމުން އަންނަ ކަމެއް ނަމަވެސް އެގޮތާ ހިތްހަމަ ޖެހި ވަޑައިނުގަންނަވާ ކަމަށާ، އެހެންވެ އެ ރަށުގައި ގައުމީ ދުވަހަކީ ގައުމީ މަޝްރޫއެއް ގޮތަށް ފާހަގަކުރަން ނިންމަވާފައިވާކަމަށް އެމަނިކުފާނު ވިދާޅުވި އެވެ.

" އަޅުގަނޑު ގަސްތުކުރަނީ، މުހިންމު މަޝްރޫއެއްގެ ގޮތުގައި މި މަރުކަޒާ [ބޮޑުތަކުރުފާނުގެ ހަނދާނީ މަރުކަޒު] އާއި އުތީމު ގަނޑުވަރާ، މި ރަށުގައި ހުރި ތާރީހީގޮތުން ހިމާޔަތްކޮށް ބަލަހައްޓަން ޖެހޭނެ ތަންތަން ހިމާޔަތްކޮށްދީ. ގައުމިއްޔަތުގެ މުހިންމު ހަރަކާތްތަކެއް މި ރަށުގައި ކުރިއަށްގެންދަން." ރައީސް ޑރ މުއިއްޒު ވިދާޅުވި އެވެ.

އެ ނިންމެވުމާއެކު މި އަހަރާއި އަންނަ އަހަރު، ރަސްމީ ގޮތުން ގައުމީ ދުވަސް ފާހަގަކުރާނެ ރަށަކަށް އުތީމު ހަމަޖައްސަވާފައިވާކަން ރައީސް އިއުލާނު ކުރެއްވި އެވެ.

ހއ. އުތީމަކީ ޕޯޗްގީޒުންގެ އަތްދަށުން ރާއްޖެ ސަލާމަތްކުރި ޖިހާދުގެ ތިން ބަތަލުން ނިސްބަތްވާ ރަށެވެ. މި ރަށުގެ އެންމެ ހާއްސަ ތަނަކީ ޕޯޗްގީޒުންނާ ދެކޮޅަށް ޖިހާދުކުރެއްވުމުގައި އިސްކޮށް ހުންނެވި ބޮޑުތަކުރުފާނުގެ ގެކޮޅު ކަމަށްވާ 16 ވަނަ ގަރުނުގައި ބިނާކޮށްފައިވާ "އުތީމު ގަނޑުވަރު" އެވެ.

ގައުމީ ދުވަސް ފާހަގަކުރަނީ ބޮޑުތަކުރުފާނުގެ ޖިހާދުގެ ޒިކުރާ އާކުރުމަށް ރަބީއުލް އައްވަލް މަހުގެ 1 ވަނަ ދުވަހު އެވެ.